Османи не знае дали партијата на Аријанит Хоџа преговара за влез во Владата, но вели дека е добредојдена во европскиот фронт

„За такво нешто конкретно немам информации (за разговори за влез на ЕДП во Владата н.з.). Тоа што можам да кажам е дека идејата е да се промовира европскиот фронт… сега кога се поминува крстопатот е време секој да се позиционира, затоа европскиот фронт е отворен за сите. Така што во него има место и за партијата на Аријанит Хоџа“, изјави Османи одговарајќи на новинарско прашање колку се точни информациите за наводни разговори на партијата на Хоџа за влез во Владата

Министерот за надворешни работи и потпретседател на ДУИ, Бујар Османи, вели дека нема информации за наводни разговори за влез на партијата на Аријанит Хоџа – Европска демократска партија (ЕДП) во Владата.

Прашан колку се точни ваквите информации и дали во наводните разговори се разгледува опцијата ДУИ да отстапи дел од своите позиции во Владата, Османи денеска на прес-конференција рече дека тоа што може да го каже е дека идејата е да се промовира европскиот фронт, во кој, како што кажа, има место и за партијата на Аријанит Хоџа.

„За такво нешто конкретно немам информации (за разговори за влез на ЕДП во Владата н.з.). Тоа што можам да кажам е дека идејата е да се промовира европскиот фронт. Никогаш како до сега општеството не е поларизирано на про Европа и анти Европа. Сега е време кога се кршат копјата, сега кога се поминува крстопатот е време секој да се позиционира, затоа европскиот фронт е отворен за сите, независно од политички партии врз основа на етничка припадност, врз основа на идеолошка припадност или каква било друга припадност надвор од ЕУ. Така што, во европскиот фронт има место и за партијата на Арјанит Хоџа и другите партии што сметаат дека сега е време, после ова на Шарл Мишел, веќе нема простор за какво било губење време“,

изјави Османи на посебната прес-конференција што ја одржа по онаа со канадската министерка за надворешни работи Мелани Жоли, која е во официјална посета на С Македонија.

Дали има или не разговори за влез на Европската демократска партија во Владата, редакцијата на „360 степени“ одговор побара од лидерот на новата партија Аријанит Хоџа, но до објавувањето на овој текст тој не одговори на нашите телефонски повици и пораки.

Хоџа, инаку доскорешен заменик-претседател на Движењето Беса, реши да се одвои од неа и да формира своја партија откако тројца политичари од албанскиот опозициски кампус – неговиот доскорешен партиски лидер Биљал Касами, Изет Меџити од „огнените“ и Африм Гаши од Алтернатива соопштија дека создаваат заеднички опозициски фронт.

Како причина за ваквиот чекор Хоџа тогаш наведе дека целта на иницијаторите не е политичка промена, туку „перење“ политички фигури кои до неодамна биле актери во одржувањето на актуелната власт во живот.

Основачкото собрание на Европската демократска партија се одржа на 12 август во Скопје, а Хоџа тогаш изјави дека новата партија ќе дејствува конструктивно во Собранието, а првата битка ќе биде носењето на уставните измени.

Новата партија ЕДП формално нема свој пратеник во законодавниот дом, но неформално за нивен претставник во Собранието може да се смета Бастри Бајрами, кој заедно со Хоџа се одвои од движењето Беса. Тој од 26 јули дејствува како независен пратеник во Собранието.