Грција им нуди бесплатен одмор на туристите кои поради пожарите беа евакуирани од Родос

„Разбираме дека тоа предизвика одредени непријатности за нашите посетители. Но, среќен сум што можам да известам дека Родос денес е подобредојден од кога било и дека островот се враќа во нормала“, изјави грчкиот премиер Кирјакос Мицотакис за британската телевизија Ај-ти-ви (ITV)

Грција за следната година ќе им понуди бесплатен седумдневен одмор на островот Родос на оние туристи што беа евакуирани поради неодамнешните пожари кои го зафатија островот.  

Ова денеска го најави грчкиот премиер Кирјакос Мицотакис говорејќи за британската телевизија Ај-ти-ви (ITV), пренесува грчки Катимерини.  

„За сите оние чии одмори беа скратени како резултат на шумските пожари, грчката влада, во соработка со локалните власти, ќе понуди една недела бесплатен одмор на Родос следната пролет и следната есен. Ова ќе обезбеди тие да се вратат на островот и да уживаат во неговата убавина“,

рече Мицотакис. 

Туризмот е еден од главните економски сектори на Грција, кој закрепна од должничката криза во 2018 година, а Родос, деветтиот по големина остров во источниот Медитеран, е една од нејзините најпопуларни туристички дестинации, потсетува регионалниот сервис на Радио Слободна Европа (РСЕ).  

Пожарот избувна на 18 јули во центарот на островот, а силниот ветер го прошири на источниот и јужниот брег, област со многу одморалишта. 

(ФОТО+ВИДЕО) Огнот на Родос повторно се разгоре, во гаснењето од воздух помагаат и екипи од Турција, Хрватска и Египет

Грција објави дека ја извршила најголемата евакуација досега преземена во земјата. Беа евакуирани повеќе од 20 000 туристи и локални жители. 

Мицотакис денеска за британската телевизија изјави дека пожарите зафатиле 5 отсто од островот и дека ситуацијата се нормализирала, но пожарот им предизвикал непријатности на посетителите. 

„Разбираме дека тоа предизвика одредени непријатности за нашите посетители. Но, среќен сум што можам да известам дека Родос денес е подобредојден од кога било и дека островот се враќа во нормала“,

вели грчкиот премиер. 

Тој исто така нагласи дека во моментов нема активни шумски пожари на островот. 

Тројца македонски државјани затекнати од пожарот на Родос, од МНР велат дека се на безбедно место

Грчкиот премиер изјави дека пожарите во земјите и на остоврите на Медитеранот не се невообичаена појава, но додаде дека климатските промени го зголемиле нивниот интензитет.