Српски функционери од БиХ и Република Српска на „црната листа“ на САД

Министерството за финансии на САД објави дека четворицата политичари што се најдоа на „црната лсита“ се директно одговорни за поттикнување на донесување закон во Народното собрание на Република Српска со кој одлуките на Уставниот суд на Босна и Херцеговина се прогласуваат за неприменливи во Република Српска

Соединетите американски држави воведоа санкции за Жељка Цвијановиќ, српската членка на Претседателството на Босна и Херцеговина (БиХ), премиерот на Република Српска (РС) Радован Вишковиќ, министерот за правда на РС, Милош Букејловиќ и претседателот на Народното собрание на РС, Ненад Стевандиќ.

Жељка Цвијановиќ, членка на Претседателството на Босна и Херцеговина
фото: архива

Министерството за финансии на САД објави дека овие политичари се директно одговорни за поттикнување на донесување закон во Народното собрание на Република Српска (НСРС), со кој одлуките на Уставниот суд на Босна и Херцеговина се прогласуваат за неприменливи во РС, со што се попречува и загрозува спроведувањето на Дејтонскиот мировен договор.

„Токму оваа акција ја загрозува стабилноста, суверенитетот и територијалниот интегритет на Босна и Херцеговина и тешко стекнатиот мир врз основа на Дејтонскиот мировен договор“,
се наведува во соопштението објавено на веб-страницата на американското Министерство за финансии.

Нивното однесување, како што се наведува, дополнително го загрозува патот на Босна и Херцеговина и нејзината успешна интеграција во евроатлантските институции.

Потсекретарот на Министерството за финансии за тероризам и финансиско разузнавање, Брајан Нелсон рече дека таквата постапка „ја загрозува стабилноста, суверенитетот и територијалниот интегритет на Босна и Херцеговина и тешко стекнатиот мир поддржан со Дејтонскиот мировен договор“.

Претходно на листата на санкционирани беше ставен и претседателот на РС, Милорад Додик, кој е и предлагач на Законот за неизвршување на одлуките на Уставниот суд на БиХ пред НСРС и главен заговорник за неговото усвојување.

САД воведоа нови санкции против Додик на 5 јануари 2022 година. Претходно Вашингтон воведе санкции против Додик на 17 јули 2017 година поради попречување на Дејтонскиот мировен договор.