Полицијата товари 2 навивачи на Шкупи и 19 на Левски од Софија за нарушување на јавниот ред и мир – пред и за време на натпреварот, а дел од нив и за физички напад на полициски службеници. Се расчистува случајот и за бугарскиот државјанин кој во Чаир бил прободен со нож
Полицијата вчера уапсила вкупно 21 лице – пред и за време на натпреварот на фудбалските клубови Шкупи од Скопје и Левски од Софија.
Од уапсените,19 биле навивачи на Левски, а двајца на Шкупи. Според Министерството за внатрешни работи, навивачите од Бугарија освен што го нарушиле јавниот ред и мир во Скопје, физички нападнале и полицајци.
„Приведени се 19 навивачи од Република Бугарија, поради нарушување на јавниот ред и мир пред и за време на натпреварот. Од нив, осум лица за насилство на спортски натпревар, две лица за физички напад на полициски службеници кои вршеле службени дејства, а девет поради агресивно однесување кон нив. По документирање на случајот против нив ќе бидат поднесени соодветни поднесоци“,
соопшти МВР.
Околу полноќ пак, полицијата уапсила и двајца навивачи на Шкупи. Тие го нарушиле јавниот ред и мир со физичка пресметка.
„И тие се приведени и ќе се соочат со законски предвидените поднесоци“,
велат од МВР.
Вчера инцидентите меѓу двете навивачки групи почнаа уште пред да стартува натпреварот. Еден бугарски државјанин беше прободен со нож, по што заврши во болница.
Бугарските медиуми првично известија дека група фанови на Левски ја напуштиле безбедносната зона и се упатиле кон Чаир каде настанала тепачка со навивачките на Шкупи. МВР вели дека се расчистува и овој случај.
„Во врска со физичкиот напад врз четирите бугарски државјани, за кој во 18:38 часот е пријавено дека се случил на ул. ‘Цветан Димов’, при што бил употребен и остар предмет до кој бугарскиот државјанин Д.А. се здобил со тешки телесни повреди, по преземени мерки и активности утврден е идентитетот на поголемиот дел од напаѓачите и се расчистува случајот, по што ќе бидат поднесени пријави. Повредениот Д.А. бил пренесен во ГОБ ‘Св.Наум Охридски’ и е во стабилна состојба“,
информира полицијата.
Видеа од инцидентот се појавија и на социјалните мрежи.
Чаирчанка, нападнати две бугарски возила pic.twitter.com/bwkoYfXJ7e
— Зеко (@MeZnaesOdSank) July 27, 2023
Инаку, натпреварот меѓу Шкупи и Левски беше во рамки на второто квалификациско коло во Конференциската лига.
Македонскиот фудбалски прволигаш го загуби првиот квалификациски натпревар од бугарски Левски. Натпреварот заврши со резултат 0:2.
ИЗВОР: 360stepeni.mk
