Груш пред конгресмените од Комитетот за надзор и одговорност изјави дека САД имаат спроведено „повеќедецениска“ програма во која имаат собрано и се обиделе да откријат како работат соборени НЛО.
Освен технологијата, според поранешниот разузнавач САД имаат најдено и „не-човечка“ биологија, иако тој признава дека никогаш немал видено вонземско тело.
Тој тврди дека откако излегол со своите тврдења се соочил со „многу брутален“ одговор, а знае и за случаи во кои „луѓе биле повредени“ во текот на владините напори за криење на информации околу НЛО. На прашањето дали слушнал за некој што е убиен заради ова, Груш одговорил „ги насочив луѓето со такво знаење кон соодветните власти.“
Поранешниот разузнавач одбил да сподели дополнителни детали со конгресмените на сослушување отворено за јавност, и побарал дополнителна средба во поприватна средина (SCIF – sensitive compartmented information facility).
Груш пред Конгресот бил придружен и од пензионираниот морнарички пилот Дејвид Фравор, кој сведочи за една вежба во 2004 над Пацификот во која биле забележани непознати летечки објекти со форма на Тик так како рапидно се спуштаат од 24 километри на 6 километри. Летањето на висина од 24 километри е исклучително тешко заради истенчениот воздух во кој леталото не може да остане долго време освен ако не патува многу брзо. Единствен човечки авион за кој се знае дека може да го направи тоа е СР-71 Блекбрд. Овие авиони се приземјени од 1999, а и леталата фатени на камерите на американските воени авиони не наликуваат ни приближно на Блекбрд.
Сведоците побарале и воспоставување на систем во кој пилотите ќе можат да известат доколку виделе НЛО, и дополнителна заштита за пилотите или свиркачите кои ќе сакаат да објават нови информации.
ИЗВОР: off.net.mk
