Состојбата со пожарите во Грција станува сè подраматична, особено околу главниот град Атина. Во повеќе региони горат домови на локални жители, а пожарникарите спасувале луѓе пред налетот на огнот. Се очекува во Атина да пристигнат и четири канадери од Италија и Франција што ќе помогнат во гасењето
Шумскиот пожар во Дервенохорија, на границата помеѓу областите Виотија и Атика, брзо се прошири во западниот дел на Атина, доби големи размери и утврдена е материјална штета.
Според портпаролот на противпожарната служба на Грција, Василис Ватракојанис, пожарот во поширокото подрачје на Лутраки на Пелопонез сè уште не е ставен под контрола. Тој додаде дека пожарникарите во соработка со полициските сили во повеќе случаи морале да интервенираат во спасување граѓани.
Првиот пожар, што изби вчера попладне, сега гори во областа Мандра, во западниот дел на областа Атика, на околу 40 километри од центарот на Атина и веќе изгореа домови на локални жители.
„Гардијан“ објави драматични снимки од дрон на кои се гледа што пожарите оставаат зад себе.
Од бројот 112 за итни случаи беше испратена порака до жителите на погодените населби или да се евакуираат или да бидат во состојба на готовност.
Паралелно, пожарникарите вечерва водеа битка огнените јазици да не стигнат до рафинеријата што се наоѓа во близина.
Според портпаролот на противпожарната служба на Грција, утре во 13 области има многу висока опасност од пожари најмногу поради метеоролошките услови.
Се очекува во Атина да пристигнат и четири канадери од Италија и Франција кои веројатно утре, штом се раздени, ќе ги засилат воздушните сили во гаснењето на пожарите, со оглед на тоа што авионите и хеликоптерите не интервенираат штом се стемни.
Грчкиот премиер денеска се врати порано од Брисел и присуствуваше на состанок во Министерството за климатски кризи и цивилна заштита.
Поврзани вести:
Извор: 360stepeni.mk
