ИСТАНБУЛ (АА) – Русија соопшти дека потенцијалното појавување на борбени авиони Ф-16 во Украина, Москва ќе го сфати како „нуклеарна“ закана, јавува Анадолу.
„Самиот факт на појавата на такви системи во вооружените сили на Украина ќе го сметаме за закана од Западот во нуклеарната сфера“, изјави министерот за надворешни работи Сергеј Лавров во интервју доцна синоќа за рускиот онлајн весник „Лента“.
Лавров изјави дека акциите на САД и НАТО претставуваат ризик од директен вооружен конфликт со Русија, кој, како што рече, е „полн со катастрофални последици“. Трансферот на борбени авиони Ф-16 во Украина е пример за такви акции, додаде тој.
„Ги информиравме нуклеарните сили, САД, Велика Британија и Франција, дека Русија не може да ја игнорира способноста на овие авиони да носат нуклеарно оружје. Никакви гаранции нема да помогнат тука“, рече Лавров.
Лавров понатаму рече дека руската војска нема да испитува дали секој конкретен авион е опремен за испорака на нуклеарно оружје или не, поради што трансферот на Ф-16 ќе го смета како закана.
Западните земји продолжуваат да ја поддржуваат Украина со воена и финансиска помош од почетокот на војната минатата година на 24 февруари. Досега тие не сакаа да пратат борбени авиони во Киев.
Сепак, Данска и Холандија играат водечка улога меѓу западните земји, обучувајќи ги украинските пилоти на борбени авиони Ф-16, напиша на Твитер американскиот секретар за одбрана Лојд Остин на 25 мај.
– „Киев е одговорен за експлодирањето на браната ‘Каховка’“
Лавров се осврна и на истрагата на Меѓународниот кривичен суд (МКС) за експлозијата на браната ‘Каховка’, тврдејќи дека Украина бара од МКС „да го истражи злосторството што таа сама го извршила“.
„Не се сомневаме дека Киев е одговорен за експлодирањето на хидроцентралата ‘Каховка’. Се чини дека режимот во Киев бара од таканаречениот Меѓународен кривичен суд да го истражи злосторството што тој сам го извршил“, рече Лавров.
Лавров понатаму рече дека Москва го предупредила Советот за безбедност на ОН за наводните планови на Украина за „уништување“ на браната „Каховка“ во октомври минатата година, но недостигот на одговор на ОН „ја зајакна довербата на украинските власти дека ќе се извлечат со тоа“.
„Што се однесува до одговорот на меѓународните хуманитарни организации на тоа што се случи, исто како и во случајот со саботажата на гасоводот за амонијак Тољати-Одеса и терористичкиот акт против Северен тек, од нив не се слушнаа принципиелни оцени“, додаде Лавров.
На 11 јуни украинскиот претседател Владимир Зеленски рече дека главниот обвинител на земјата пратил барање до МКС да ја истражи експлозијата на браната „Каховка“ и дека работата „веќе е започната“.
И Москва и Киев се обвинуваат меѓусебно за нападите на браната лоцирана во украинската област Херсон на 6 јуни, што доведе до делумно уништување на бариерата, а тоа резултираше со поплави во околните области.
Извор: www.aa.com.tr
