По Финска, Шведска ќе стане 32. земја-членка на Алијансата откако во Вилнус беше постигнат договор за тргање на блокадата од Турција
Шефот на дипломатијата, Бујар Османи, од главниот град на Литванија, Вилнус, оцени дека се одлични вестите што се постигнал договор Турција да го одблокира приемот на Шведска во НАТО.
„Одлични вести од овде од Вилнус! За време на НАТО самитот се постигна политички договор со кој нашиот сојузник Шведска се приклучува во трансатлантското семејство, продолжувајќи го патот до полноправно членство како 32 земја – членка на НАТО. По членството на Финска, ова е најважниот политичко – безбедносен настан кој не само што значително ја зајакнува моќта на Алијансата, туку и силно ќе влијае на долгорочната безбедност и стабилност на Европа“,
вели Османи кој заедно со министерката за одбрана Славјанка Петровска е дел од делегацијата што ја предводи премиерот Димитар Ковачевски на Самитот во Вилнус.
Веста за постигнатиот договор претходно ја објави генералниот секретар на НАТО, Јенс Столтенберг.
Пред да се постигне договорот, пак, турскиот претседател Реџеп Таип Ердоган го поврза членството на Шведска во НАТО со започнувањето на пристапните преговори на Турција со ЕУ поставувајќи го тоа како услов.
„Никој не треба да очекува отстапки од нас, Анкара секогаш била за политиката отворени врати во НАТО, но првин отворете го патот за Турција во Европската Унија, па потоа ќе го расчистиме патот за кандидатурата на Шведска, исто како што направивме во случајот со Финска“,
рече Ердоган.
На ова реагираа и германскиот канцелар Олаф Шолц и американскиот Стејт департмент со порака дека Турција не треба да ја поврзува едната работа со другата.
Извор: 360stepeni.mk
