Никој не треба да очекува никакви отстапки од наша страна, Анкара секогаш ја поддржувала политиката на „отворени врати“ на НАТО алијансата, но во исто време поради долгиот и голем застој во евроинтеграцискиот процес на Турција, мора да кажам дека ние ќе дозволиме Шведска да влезе во НАТО како што дозволивме на Финска, но само доколку најпрвин се отвори патот за влез на Турција во Европската унија, рече турскиот претседател Реџеп Таип Ердоган
Иако Турција поднесе барање за членство во тогашната Европска економска заедница во 1987 г. и за членство во Европската унија на крајот на минатиот век, во 1999 г., сепак поради недостаток на ентузијазам кај одредени клучни земји членки на Европската унија – преговорите за пристапување во Европската унија никогаш не вродија со плод.
Ердоган, денеска, пред да отпатува на самитот на НАТО во Литванија, прашан за тоа дали Турција конечно ќе даде зелено светло за влез на Шведска во НАТО алијансата, одговори дека неговата земја нема да се противи на такво нешто, но само доколку се одмрзне процесот на интегрирање на Турција во европското семејство
„Никој не треба да очекува отстапки од нас, Анкара секогаш била за политиката „отворени врати“ во НАТО, но првин отворете го патот за Турција во Европската унија, па по тоа ќе го расчистиме патот за кандидатурата на Шведска, исто како што направивме во случајот со Финска“,
рече Ердоган.
Турција се уште не ја одобрува кандидатурата на Шведска за членство во НАТО, а како причина, Анкара ги наведува недоволната битка против како што велат „терористичките групи“ и немањето волја Стокхолм да екстрадира одредени лица поврзани со тероризам во Турција.
Извор: 360stepeni.mk
