Неколку сојузници на САД изразија вознемиреност по одлуката на Вашингтон да и достави на Украина касетни бомби. Во петокот, САД потврдија дека го испраќаат контроверзното оружје во Украина, а претседателот Џо Бајден чекорот го нарече „многу тешка одлука“. Велика Британија, Канада, Нов Зеланд и Шпанија изјавија дека се против употребата на на ова оружје
Касетните бомби се забранети во повеќе од 100 земји поради опасноста што ја претставуваат за цивилите. Овој тип на вооружување ослободува многу помали бомби кои можат неселективно да убијат на релативно широк простор. Неексплодираните бомби може да стојат на терен со години, а потоа да се активираат.
Претседателот Џо Бајден во интервју за Си-ен-ен во петокот изјави дека разговарал со сојузниците за одлуката, која била дел од пакетот воена помош вреден 800 милиони долари. Тој рече дека му требало „некое време самиот да се убеди тоа да го направи тоа“, но дека го презел чекорот затоа што „на Украинците им снемувало муниција“.
Одлуката наиде на остри критики од групите за човекови права – Амнести интернешнал рече дека касетната муниција претставува „сериозна закана за животите на цивилите, дури и долго по завршувањето на конфликтот“.
На одлуката на Вашингтон реагираа и дел од клучните западни сојузници порачувајќи дека нема да дадат поддршка. Британскиот премиер Риши Сунак изјави дека неговата земја е една од 123 држави кои ја потпишале Конвенцијата за касетна муниција, која забранува производство или употреба на ова оружје. Пораките на Сунак додоа пред европската турнеја на Бајден и нивната заедничка средба во пресрет на НАТО самитот во Литванија.
Премиерот на Нов Зеланд – една од земјите најголеми поборници на Конвенцијата за забрана на касетната муниција, изјави дека ова оружјето е во состојба да предизвика огромна штета и бројни жртви кај цивилното население со долготраен ефект. Шпанската министерка за одбрана, Маргарита Роблес, порача дека нејзината земја има „цврста посветеност“ за одредени оружја и бомби да не можат да се испраќаат во Украина.
„Не за касетните бомби и да на легитимната одбрана на Украина, за која разбираме дека не треба да се спроведува со касетни бомби“,
рече Роблес.
Во досегашните борби во Украина и двете страни користеле јасетна муниција.
Канадската влада соопшти дека е особено загрижена за потенцијалното влијание на касетните бомби кои понекогаш лежат недетонирани со десетици години и се огромна опасност за децата. Германија, исто така потписничка на Конвенцијата, прат порака дека и покрај фактот што нема да обезбеди такво оружје за Украина, ја разбира американската позиција.
„Сигурни сме дека нашите американски пријатели лесно не ја донесоа одлуката за снабдување на Украина со таква муниција“, изјави портпаролот на германската влада Штефен Хебестрајт.
Украинскиот министер за одбрана даде гаранција дека касетните бомби ќе се користат само за пробивање на непријателските одбранбени линии, а не и во борби во урбаните области. Портпаролката на руското Министерство за надворешни работи, Марија Захарова, гаранциите на Украина за одговорна употреба на касетната муниција ги нарече „безвредни“.
Извор: 360stepeni.mk
