Во истрагата на Основното јавно обвинителство се осомничени дваесет физички лица и едно правно лице. Од нив, 18 се веќе уапсени, додека пак две лица се во бегство. Осомничените се товарат дека во текот на 2021 и 2022 г. организирале и учествувале во пренесување патнички моторни возила во земјава на нелегален начин користејќи лажни јавни исправи со кои ги регистрирале возилата, по што биле продавани на македонскиот пазар
Досега во истрагата се опфатени 15 луксузни возила – 14 патнички моторни возила и еден мотоцикл чиј износ изнесува околу 600 000 илјади евра
Основното јавно обвинителство во соработка со Министерството за внатрешни работи, по долга и сложена истрага која траела околу една година, утринава покрена обвинение за 20 лица кои се осомничени за повеќе кривични дела – поттикнување на криумчарење, прикривање стоки кои се предмет на криумчарење и фалсификување исправа. Од 20. осомничени лица, 18 се лишени од слобода, додека пак две се во бегство.
Истрагата според обвинителката која го води случајот, Наташа Сарамандова, траела долго време и поради нејзината сложеност бил вклучен и обвинител во фаза на обезбедување докази за да се откријат сите траги и начинот на извршувањето на кривичните дела од страна на обвинетите. Од 20. осомничени лица, пет се службени лица вработени во Министерството за внатрешни работи кои им помагале на другите да ги шверцуваат возилата од странство во земјава, но и потоа помагале при нивната легализација издавајќи им валидни македонски регистарски таблички и сообраќајни документи.
„Во моментов се лишени од слобода 18 лица, додека две лица се во бегство. Против осум лица ќе бидат поднесени предлози мерка притвор, од кои за шест лица веќе е обезбедена мерката, две лица се во бегство и за нив ќе биде побарана мерка притвор во бегство. За преостанатите ќе се предложи мерка обезбедување“,
вели Сарамандова.
Претресите биле извршени во четири града – 22 во Скопје и по еден во Битола, Ресен и Кочани. Обвинителството побара притвор за 8 лица, додека пак за другите опфатени во истрагата побара мерки за безбедност, односно, одземање на патните документи, забрана за напуштање на живеалиштето, и редовно појавување на суд. Сарамандова рече дека постојат сомнежи за постоење и на други вакви возила, но не сакаше да открие детали околу тоа дали ќе има проширување на истрагата.
Какви возила биле криумчарени во Македонија?
Обвинителката Сарамандова во своето излагање кажа дека сите возила што се опфатени во истрагата се украдени или затаени во западноевропските земји, кои потоа со фалсификувани документи се внесени на територија на Македонија. Станува збор за вкупно 15 возила кои се произведени во 2020 и 2021 г. и имаат вредност од околу 500-600 илјади евра.
Како возилата стигнувале до нашата земја?
Возилата се потекнуваат од различни европски земји, а она што е заедничко за нив е тоа што сите се луксузни автомобили кои биле предмет на потрага во земјите на потекло. Четири лица кои биле поттикнати од првите осум осомничени преку различни гранични премини ги внесувале автомобилите во земјата не пријавувајќи ги за царинење, додека пак 5 лица – референти за управни работи во МВР – овозможувале регистрација на возилата иако биле свесни дека документацијата за возилата е невистинита. Со цел да ги прикријат трагите за потеклото на автомобилите, другите осомничени вршеле купопродажба неколкупати во краток временски период за цена која била далеку пониска од пазарната. На крај автомобилите биле продавани на домашни физички и правни лица.
ИЗВОР: 360stepeni.mk
