ЕРУСАЛИМ (АА) – Латинската парохија во Џенин претрпе штета од тековната израелска воена операција во палестинскиот град, соопшти денес Латинската патријаршија на Ерусалим, јавува Анадолу.
„Градот Џенин се соочува со невидена израелска агресија што ги има како цел луѓето и земјата“, се вели во соопштението на патријархот Пјербатиста Пицабала.
„Латинската парохија во градот претрпе штета од оваа агресија“, додаде тој.
Патријаршијата објави фотографии кои го покажуваат обемот на штетата.
Пицабала повика на итен прекин на огнот и „постигнување меѓусебен дијалог за да се спречат ваквите неоправдани злосторства“.
Израелската Армија во понеделникот ја започна својата најголема воена операција во Џенин во повеќе од 20 години, при што загинаа најмалку 10 Палестинци, а беа повредени повеќе од 100, објави палестинското Министерство за здравство.
Израелската офанзива се случи за време на зголемени тензии низ окупираниот Западен Брег во последните месеци, поради повторените напади на Израел во палестинските градови.
Според податоците на Министерството за здравство, речиси 190 Палестинци загинале од израелски оган од почетокот на оваа година. Најмалку 25 Израелци исто така го изгубиле животот во одвоени напади во истиот период.
Извор: www.aa.com.tr
