Марк Руте: Ја изразивме нашата загриженост за тензиите на северот на Косово

Премиерите на Холандија и Луксембург, Марк Руте и Ксавиер Бетел, денеска во Приштина се сретнаа со претседателката Вјоса Османи и со премиерот. По средбите Руте соопшти дека ја изразил својата загриженост за тензиите на северот на Косово и дека дијалогот и нормализацијата на односите меѓу Косово и Србија е важен за интеграција на земјата во Европска Унија

„Регионалната стабилност е тежок и важен процес и затоа денеска ја изразивме важноста од смирување на тензиите меѓу Косово и Србија. Холандија и Луксембург се обидуваат да ги поттикнат двете страни на дијалог за нормализирање на односите. Ова е важно не само за мирот и стабилноста во регионот туку и за просперитетот и интеграцијата во Европската Унија“,

рече Руте.

Руте дополни дека чекорите за деескалација на ситуацијата треба да дојдат од двете страни.

Курти побарал од двајцата премиери да му помогнат на Косово на патот кон членство во НАТО и ЕУ. За дијалогот со Србија, Курти рече дека сакаат европски решенија и спроведување на договорите.

„Во однос на дијалогот за нормализација на односите со Србија, истакнав дека Косово е заинтересирано за добрососедски односи. Сакаме европско решение и за ова го имаме основниот договор од 27 февруари и анексот за имплементација од 17 март за кој сакаме да се спроведе во целост, без одложувања и без услови“.

изјави Курти.

Курти денеска ќе има средба и со специјалниот претставник на Европската Унија за дијалогот меѓу Србија и Косово, Мирослав Лајчак, кој ќе ги посети и Приштина и Белград.