Приватниот погреб, како што јави Си-ен-ен, помина мирно и во тишина. На барање на семејството, ниту една новинарска екипа не присуствувала на погребот на тинејџерот, велејќи дека сакаат во мир да оттагуваат за смртта на момчето
Во кругот на семејството и пријателите денеска на локалните гробишта во париското предградие Нантер беше погребан 17-годишниот тинејџер Нахел, кој беше убиен од страна на француската полиција, а чија смрт предизвика големи немири во Франција изминатите неколку дена.
Приватниот погреб, како што јави Си-ен-ен, помина мирно и во тишина.
Богослужбата во џамијата во Нантер почнала напладне, а ковчегот со телото на момчето потоа бил однесен на локалните гробишта. Околу џамијата имало силно обезбедување.
На барање на семејството, ниту една новинарска екипа не присуствувала на погребот на тинејџерот. Адвокатите на роднините побарале од новинарите да се држат настрана од церемонијата, велејќи дека семејството на Нахел сака во мир да оттагува за смртта на момчето.
Убиството на тинејџерот од страна на припадник на француската полиција доведе до масовни немири во Франција изминатите неколку дена. Неговата смрт ги разгоре долготрајните поплаки од сиромашните и расно мешаните урбани заедници за полициското насилство и расизмот.
Во насилните протести само изминатата ноќ беа приведени над 1 300 луѓе, а повредени 79 полицајци. Запалени се околу 1 350 автомобили, а опожарени или оштетени се 234 објекти.
За справување со нередите се ангажирани околу 45 000 полицајци, неколку оклопни возила и хеликоптери.
Поради тензиите кои ја зафатија земјата, претседателот Емануел Макрон ја одложи својата официјална посета на Германија која требаше да биде прва на француски претседател по 23 години.
Извор: 360stepeni.mk
