(ФОТО) Откорнати дрвја во невремето во Скопје, едно падна врз автомобил во движење

Засега нема пријави за повредени граѓани во невремето кое со пороен дожд и силен ветер го зафати главниот град нешто пред 16 часот попладнево

Центарот за управување со кризи (ЦУК) информира за паднати дрвја, од кои едно врз автомобил во движење, како резултат на краткото, но силно невреме кое попладнево ја зафати скопската котлина.

„Едно од дрвјата, во населба Мичурин во Аеродром падна врз автомобили и на еден во движење, среќа само на задниот дел на автомобилот во движење“,

информираат од ЦУК.

Претходно, дел од медиумите објавија дека како последица на невремето има паднато дрво и на улицата „Симеон Кавракиров“ во близина на Транспортниот центар.

Засега нема пријави за повредени граѓани во невремето кое со пороен дожд и силен ветер го зафати главниот град нешто пред 16 часот попладнево.

Управата за хидрометеоролошки работи (УХМР) претходно денеска најави дека во попладневните и вечерните часови се очекува нестабилно време со локален пороен дожд, грмежи и засилен ветер. На одредени места, прогнозира УХМР, процесите ќе бидат во форма на невреме со интензивен пороен дожд, силен ветер и град. 

Нестабилно време со локален пороен дожд нѐ очекува и утре.