Кремљ започна „масовна чистка во редовите на руските вооружени сили“ после бунтот на Вагнер, тврдат западни извори повикувајќи се на руски воени дописници.
Се вели дека истрагите таргетираат луѓе осомничени за неуспехот да се спречи бунтот или пак за нивна соработка во тоа а меѓу осомничените има високи команданти.
Се тврди дека началникот на генералштабот на Русија, генералот Валериј Герасимов, кој е еден од најчесто обвинуваните за руските воени неуспеси, „формално ја задржува својата функција, но „повеќе не е вклучен во одлуките“ поврзани со инвазијата на Украина.
Целокупната команда на „специјалната воена операција“ сега му е предадена на командантот на воздухопловните сили Михаил Теплински, велат повеќе руски воени канали.
Генералот Сергеј Суровикин за кој се смета дека е во блиски врски со првиот човек на Вагнер, Евгениј Пригожин, не е виден од крајот на бунтот и се тврди дека е на распит безбедносните служби.
Сликата дополнително е комплицирана поради бројот на високи команданти кои оперирале и во врвот и на руската војска и во платеничката фракција. Поранешниот заменик министер за одбрана Михаил Мизинцев беше отпуштен од функцијата во април, а една недела подоцна му се приклучи на Вагнер. И тој се соочува со истрага за можна улога во бунтот.
Истрагите се протегаат и на пониските чинови на војската кои не успеаја да го запрат маршот кон Москва.
Владимир Путин ја остави отворена можноста за дисциплински постапки за финансиски малверзации против Вагнер, наспроти договорот по кој учесниците во бунтот ќе заминеа за Белорусија, ќе се приклучеа на руската војска или ќе ги симнеа униформите.
„Пригожин сега сфаќа дека „амнестијата“ што ја доби во договорениот договор ги покрива само кривичните пријави за бунт“, твитна политичкиот аналитичар Дмитри Алперович. „Тој сега може да биде кривично гонет за нови неповрзани обвиненија како што се злоупотреба на државен имот, корупција, даночно затајување…. „Таквите обвиненија дури и не мора да се измислуваат, бидејќи Пригожин е речиси сигурно виновен за многу горенаведени прекршоци“.
ИЗВОР: off.net.mk
