Трагичен крај на потрагата по семејството Пацоли – трите безживотни тела пронајдени во автомобилот извлечен од Лепенец

Автомобилот на семејството Пацоли беше пронајден од тим на Специјалната антитерористичка единица „Тигар“. По операцијата за негово извлекување од реката, во него се пронајдени телата на таткото, мајката и малолетниот син

Трите безживотни тела на членови на семејството Пацоли од Косово се пронајдени во автомобилот кој доцна попладнево беше извлечен од водите на реката Лепенец, потврдија од Министерството за внатрешни работи.

Нивниот автомобил марка „бе-ем-ве“ беше пронајден од тим на Специјалната антитерористичка единица „Тигар“. По операцијата за негово извлекување од реката, во него се пронајдени телата на таткото, мајката и малолетниот син.

„Министерството за внатрешни работи ја информира јавноста дека денеска (18.06.23) од страна на полициски службеници од Специјалната антитерористичка единица ‘Тигар’ во реката Лепенец се пронајдени починати трите лица по кои се трагаше по вчерашната сообраќајна несреќа на патот Скопје – ГП Блаце. Пронајдено е и возилото ‘бе-ем-ве’ во кое тие се превезувале“,

соопшти МВР.

На ова претходеа подготовки за извлекување на пронајденото возило. Багер го расчистуваше речното корито, а во близина на местото имаше противпожарно возило, како и комби-возило на погребното претпријатие „Бутел“.

Нуркачката екипа тогаш потврди дека автомобилот по кој се трагаше цели 24 часа е пронајден, а потрагата беше отежната поради надојдените води на Лепенец.

Од безбедносни причини новинарските екипи и присутните граѓани добија наредба да се оддалечат од местото додека во близина се поставуваа сајли за извлекување на автомобилот.

Сообраќајната несреќа се случи вчера попладне. Четиричленото семејство Пацоли со автомобил падна во реката по судир со возило со скопски таблички кое ја претекнувало колоната во која бил и автомобилот „бе-ем-ве“ на Пацоли. 21-годишниот син успеал да се извлече од автомобилот и бил спасен од реката.

Полицијата соопшти дека возачот на автомобилот марка „фолксваген туран“, кој ја претекнувал колоната, е лишен од слобода.

„Како што веќе претходно информиравме, по наредба на јавен обвинител, возачот на возилото ‘фолксваген туран’ Б.Б. е лишен од слобода и задржан за понатамошно постапување“,

додаваат од МВР.