Резолуцијата пред пратениците во германскиот парламент ја претстави државната секретарка за Европа во германската влада, Ана Лирман, која доаѓа од редовите на Зелените, наведувајќи дека со неа „им оддаваме длабока почит на македонскиот идентитет, јазик, култура и историја”
Двајцата пратеници од десничарските ЦДУ и ЦСУ, Кристоф Плос и Тобијас Винклер, кои учествуваа во дебатата, настапија со критики кон владејачкото мнозинство, бидејќи, како што рекоа, со резолуцијата ја издвојува Северна Македонија од останатите земји од Западен Балкан, спротивно на политиката што претходно ја спроведувала поранешната германска канцеларка Ангела Меркел
На критиките на опозцијата одговорија пратеникот на владејачките социјадемократи (СПД) Јосип Јуратовиќ и неговиот колега од редовите на либералите Томас Хакер, истакнувајќи дека секоја земја кандидат за членство во Европската Унија секогаш се вреднувала поединечно, а не го група. Јуратовиќ воедно побара од конзервативната ЦДУ да влијае на нивната сестринска партија во земјава ВМРО-ДПМНЕ за уставните измени
Германскиот парламент – Бундестагот, со мнозинство гласови на пратениците од трите владејачки партии – Социјалдемократите, Либералите и Зелените вечерва ја изгласа резолуцијата со која се дава поддршка на македонскиот идентитет, јазик и култура на патот на земјава кон членство во Европската Унија.
Резолуцијата не доби поддршка од опозициските партии, вклучително и од конзервативната Христијанско-демократска унија/Христијанско-социјална унија (ЦДУ/ЦСУ) на поранешната канцеларка Ангела Меркел.
Инаку, ЦДУ и баварската ЦСУ идеолошки се сестрински партија на ВМРО-ДПМНЕ.
Со карактеристична германска прецизност, расправата по предлог-резолуцијата почна во 21:25 часот и заврши во 21:55 часот, како што претходно беше најавено на официјалната интернет-страница на Бундестагот.
Предлог-резолуцијата пред пратениците ја претстави државната секретарка за Европа во германското Министерство за надворешни работи, Ана Лирман, која е од редовите на Зелените.
„Со оваа резолуција им оддаваме длабока почит на македонскиот идентитет, јазик, култура и историја“,
рече Лирман, пренесува Дојче веле.
Таа воедно најави дека наскоро повторно ќе ја посети земјава заедно со нејзините колеги од Франција и од Полска за да ги охрабрат уставните измени чие донесување е услов за земјава да го продолжи својот пат кон членство во Европската Унија.
„Граѓаните ја губат вербата во ЕУ перспективата. Мора да ја вратиме довербата во ЕУ и да ги искористиме сите можности за да ги охрабриме нашите партнери во Северна Македонија“,
рече Лирман најавувајќи ја посетата, четврта во последната година.
Таа порача дека промената на Уставот не го загрозува македонскиот идентитет, туку напротив го зајакнува мултиетничкиот карактер на државата.
„Тврдењата дека ова ќе го загрози идентитетот се погрешни. Вметнувањето дополнителни заедници во Уставот, напротив само ќе го зајакне мултиетничкиот карактер на државата која е пример за целиот регион“,
рече Лирман.
Ставот против резолуцијата пред Бундестагот го образложија двајца пратеници од ЦДУ/ЦСУ. Кристоф Плос од ЦДУ се огласи со критики кон владејачкото мнозинство затоа што, како што рече, ја издвојува Северна Македонија од останатите држави од регионот на Западен Балкан.
„Да се разгледува секоја земја од Западниот Балкан одделно не е целисходно“,
рече Плос.
Тој потсети дека поранешната германска канцеларка Ангела Меркел на регионот секогаш му пристапувала како на целина.
И неговиот колега од баварската ЦСУ, Тобијас Винклер, во сличен тон ја критикуваше предлог-резолуцијата со кој се издвојува Северна Македонија и побара да се прифати предлогот на неговата пратеничка група во која се бара поддршка за сите шест земји од Западен Балкан.
„Барате резолуција само за една земја, со лош тајминг“,
рече Винклер.
Тој во своето образложение наведе дека ситуацијата во Северна Македонија е политички чувствителна и дипломатски сензитивна, алудирајќи притоа на спорот со Бугарија.
На крајот тој иронично им порача на пратениците од владејачкото мнозинство дека преведената резолуција е веќе објавена во македонските медиуми, па можат да се радуваат уште пред гласањето, забележува Дојче веле.
Пратеникот на владејачките Социјалдемократи (СПД) Јосип Јуратовиќ и неговиот колега од редовите на либералите Томас Хакер одговорија на критиките на опозицијата, со став дека секоја земја кандидат за членство во Европската Унија секогаш се вреднувала поединечно, а не во група.
„ЕУ процесот е регата и се вреднуваат индивидуалните постигнувања. Не може последниот да го чека првиот. Денеска се работи за искрената политика на проширување на ЕУ. Северна Македонија е кандидат од 2005 и сега е време“,
рече Јуратовиќ.
Тој истакна дека со резолуцијата сакаат да ја охрабрат Македонија и дека македонската култура ќе ја збогати Европската Унија.
Јуратовиќ побара од конзервативната ЦДУ да влијае на нивната сестринска партија во земјава ВМРО-ДПМНЕ за уставните измени. Тој од владата на премиерот Олаф Шолц побара во ЕУ да се залага за укинување на правилото за одлучување со консензус и негова замена со квалификувано мнозинство, затоа што, како што рече, популистите го злоупотребуваат актулениот начин на одлучување.
Пратеникот на крајно десничарската АФД Маркус Фронмајер го повтори партискиот став што тие го имаа изнесено во посебна резолуција дека на земјите од Западен Балкан не им е местото во ЕУ.
Иронично прашувајќи: „Ја сакате Северна Македонија во ЕУ?“, тој рече дека станува збор за една корумпирана и нестабилна држава.
„Просечната социјална помош во таа земја е 50 евро месечно. Замислете таа земја да влезе во ЕУ и на два милиони луѓе да им дадеме пристап до нашиот социјален систем”,
реле Фронмајер.
За него беше спорно и барањето од резолуцијата според кое германската влада треба да помогне за енергетската независност на земјата.
„Со младинска невработеност од 40 отсто и секој петти жител кој живее под границата на сиромаштија, токму сончеви колектори се она што и треба на земјата“,
рече Фронмајер.
ИЗВОР: 360stepeni.mk
