Говорејќи на темата за уставните измени, кои земјава треба да ги направи за да продолжи со европската интеграција, ексамбасадорот на САД во земјава Џес Бејли кажа оти иако за дел од граѓаните во земјава промените на Уставот се неприфатливи, сепак, како што додаде, за пет години отсега со спроведување на уставните измени, луѓето на тоа ќе гледаат како на позитивен чекор за државата
Уставните измени се јасно решение за бугарското вето што ќе ја засилат позицијата на Северна Македонија, но разочарувачки ќе биде ако на нејзиниот пат кон Европската Унија земјата се соочи со ново вето, вели поранешниот амбасадор на САД во земјава, Џес Бејли, во интервју за Гласот на Америка.
Говорејќи на темата за уставните измени, кои земјава треба да ги направи за да продолжи со европската интеграција, ексамбасадорот кажа оти иако за дел од граѓаните во земјава ваквите измени се неприфатливи, сепак, како што додаде, за пет години отсега со спроведување на уставните измени, луѓето на тоа ќе гледаат како на позитивен чекор за земјата.
Сепак, додаде оти Соединетите Американски Држави би биле разочарани доколку Северна Македонија се соочи со уште едно вето кое ќе ја закочи нејзината евроинтеграција. Ако државата сега не ги почне преговорите, според него не е јасно колку долго дополнително ќе биде одложено пристапувањето во ЕУ.
„Додека поминувате низ процесот и отворате поглавја, одредени земји ќе сакаат да се уверат дека самите критериуми се исполнети, така што ќе има и други прашања на патот. И затоа мислам дека е важно секое прашање да не се гледа како нелегитимно прашање меѓу земјите членки, бидејќи тоа е дел од процесот. Тоа ќе биде долг процес да се помине низ некои од тие поглавја, особено за владеењето на правото. Земјата ќе биде под голем надзор, тоа е јасно, исто како и Албанија и другите кандидати. Но, мислам дека сум оптимист. Мислам дека луѓето ќе видат дека ова ќе се случи. Но, не можам да кажам кога“,
изјави Бејли.
Тој вели оти и Преспанскиот договор, исто како и уставните измени сега, бил критикуван на почетокот, но дека веќе никој не го спори позитивниот исход од него. Прашан дали овој Договор разочара во однос на европската перспектива, Бејли во интервјуто за Гласот на Америка посочи дека целта на Преспанскиот договор првенствено беше решевање на проблемот со Грција и нејзината блокада поконкретно за членството на земјава во НАТО.
„Но, очигледно, тој беше дизајниран да го постави патот кон ЕУ. Вие сте во ситуација која е тешка и тоа е фрустрирачки. Но, мислам дека ако земјата продолжи по својот стратешки пат, колку и да е тоа тежок, таму има подобра иднина. Важно е да се задржи таа поширока визија, како што разгледувате некои краткорочни прашања кои можеби изгледаат многу тешки, но на крајот, како и со многу одлуки во животот, кога ќе ја направите таа одлука, се покажува дека сепак не била толку лоша“,
смета Бејли.
Поранешниот американски амбасадор во земјава вели дека уставните измени ќе ја засилат позицијата на Северна Македонија, а проблемот на Бугарија, како што рече, е тоа што не го признава македонското малцинство и покрај пресудите на Европскиот суд за човекови права (ЕСЧП).
„Северна Македонија отсекогаш била и е многу инклузивна земја во тој поглед, и мислам дека уставниот амандман предложен во моментов само го зголемува тоа, така што ако Бугарија одлучи да не го прави тоа, добро, тоа е нејзин проблем“,
вели Бејли.
Темата за спроведувањето на уставните измени, кои пред сè се однесуваат на внесувањето на Бугарите, но и на други народи во највисокиот правен акт на државата, беше дел од лидерската средба на премиерот и лидер на СДСМ, Димитар Ковачевски и претседателот на опозициската ВМРО-ДПМНЕ, Христијан Мицкоски, која се одржа на 7 јуни во Клубот на пратениците.
Средбата заврши без конкретен договор меѓу лидерот на власта и опозицијата по однос на ова прашање, но и двајцата оставија можност за продолжување на дијалогот.
