Косово е отворено за можноста за нови избори во општините со мнозинско српско население

Говорејќи во оваа насока, министерка за надворешни работи на Косово, Доника Гервала-Шварц, рече дека прекинот на насилството е првиот услов за косовските власти да почнат да размислуваат за нови избори во општините со мнозиско српско население

Косово е отворено за можноста за нови избори во четирите општини со мнозинско српско население на северот на Косово по настанатите немири, но пред тоа треба да се преземат други чекори, изјави во вторникот косовската министерка за надворешни работи Доника Гервала-Шварц.

Говорејќи по средбата со чешкиот министер за надворешни работи во Прага, Гервала-Шварц рече дека прекинот на насилството е првиот услов за косовските власти да почнат да размислуваат за нови избори.

„Отворени сме за нови избори во четирите општини, но за да дојдеме до нив потребно е да се преземат други чекори“,

рече таа.

Шефицата на косовската дипломатија додаде дека на Косово му е потребна „посветеност од Србија дека нема да им се заканува на Србите во Косово да не учествуваат на изборите“, додавајќи дека луѓето не треба да чувствуваат закана од насилство.

Одржувањето на нови локални избори во општините со мнозинско српско население во Косово е барањето кое САД и Европската Унија го упатија до Приштина по избивањето на тензиите на северот на Косово.

Немирите настанаа откако косовските власти поставија новите градоначалници, етнички Албанци, во општините со мнозинско српско население откако беа избрани со излезност од само 3,5 проценти, што, пак, ги налути Србите кои се мнозинство во регионот и кои ги бојкотираа локалните избори.

• Ескобар: Курти има два дена да одговори на барањата на САД и ЕУ