АМСТЕРДАМ (АА) – Првиот паркинг за велосипеди во модерен комплекс изграден под вода во Амстердам речиси ја достигна својата максимална пополнетост за помалку од четири месеци, што уште еднаш потврдува дека Холандија со право често се нарекува земја на велосипеди, јавува Анадолу.
Сместен преку улицата од железничката станица и тоа под вода, паркингот за велосипеди во Амстердам е отворен на крајот на јануари и има капацитет од 7.000 места.
Изградбата на оваа модерна зграда траеше четири години. Со паркингот управува локалната администрација. Првиот ден од паркирањето е бесплатен, а секој нареден ден се наплаќа по цена од 1,35 евра.
Комплексот има три излези, вклучувајќи директни врски со метрото и железничките станици.
До овој паркинг, зад железничката станица во Амстердам, има уште еден паркинг со капацитет од 4.000 велосипеди. На таа локација има уште две паркиралишта со капацитет од 1.550 и 1.300 велосипеди. Затоа, во близина на железничката станица во Амстердам, обезбеден е паркинг за вкупно 13.850 велосипеди.
Според податоците на локалната администрација и компанијата „Прораил“, железничката станица во Амстердам секојдневно ја користат околу 200.000 луѓе, а голем дел од нив доаѓаат со велосипеди.
– Земја на велосипеди –
Велосипедите се незаменлив дел од секојдневието во Холандија, каде што ги користат сите, од деца до постари лица.
Со 17 милиони жители, Холандија е позната како „земја на велосипеди“ со 23 милиони велосипеди и просечни 1,3 велосипеди по глава на жител.
Холандија има 37.000 километри велосипедски патеки, кои се блиску до обемот на Земјата. Во Холандија, во просек, секој човек поминува 888 километри годишно со велосипед.
Најголемиот паркинг за велосипеди во светот со капацитет од 12.500 места се наоѓа во холандскиот град Утрехт, а токму овој град е прогласен за најповолен град за корисниците на ова превозно средство.
– Корисниците задоволни од чистотата на паркингот –
Иако постојано работи на подобрување на инфраструктурата наменета за велосипедистите, холандската Влада тешко ги следи потребите што произлегуваат од сè поголемите потреби на велосипедистите, особено во центрите на големите градови.
Амстердамецот Андреј Аверјанов (33) за Анадолу изјави дека не може да го замисли животот без велосипед.
„Животот во градот е невозможен без велосипед. Претходниот паркинг не изгледаше добро, беше валкан, беше многу тешко да се најде место и не беше безбедно. За среќа тие го отворија ова ново место. Ова е многу сериозен развој. Почист и побезбеден паркинг“, рече Аверјанов.
И 30-годишната Медисон Луч рече дека е среќна со новиот паркинг и дека нејзиниот велосипед сега е безбеден и заштитен од дождот.
„Ми се допаѓа тука, чисто е и е бесплатно првите 24 часа“, рече Луч.
Лајс Вутсфелд, кој патува меѓу Амстердам и Хаг поради својата работа, рече дека новиот паркинг го продолжил неговото патување, додека претходниот паркинг бил многу блиску до железничкиот перон.
„Предниот дел од новиот паркинг е обично полн, ми требаат десет минути да стигнам до возот откако ќе го паркирам велосипедот одзади“, рече Вутсфелд.
Извор: www.aa.com.tr
