Тројца убиени во Ново Мексико, полицијата го застрела напаѓачот

Гувернерката од Ново Мексико оцени дека инцидентот не е закана за јавната безбедност

Најмалку три лица се убиени во пукање во градот Фармингтон во сојузната американска држава Ново Мексико.

Двајца полицајци се ранети за време на престрелката со напаѓачот и се пренесени во болница, соопштија од полициската управа во овој американски град.

Загина и напаѓачот кој беше застрелан од полицијата.

Идентитетот и возраста на жртвите, како и на напаѓачот се уште не се потврдени од властите. Она што го објави полицијата, покрај информацијата за пукањето, е замолница до населението да ја избегнува областа на авенијата Дастин додека траат истражните дејствија.

Поради пукањето, на два часа беа заклучени и училиштата во Фармингтон.

Гувернерката од Ново Мексико, Мишел Лујан Гришам во изјава за медиумите оцени дека инцидентот не претставува закана за јавната безбедност и порача дека дала насоки институциите на оваа сојузна држава да ѝ помогнат на локалната полиција со цел да се спроведе темелна истрага.