Преговарачот од Србија рече дека нема напредок и ја обвини другата страна за неуспехот. Претставникот на Косово, пак, рече дека денеска разговарале само за она во која насока се движи дијалогот и за имплементација на договорот
Денешната нова рунда преговори помеѓу Белград и Приштина, заврши без конкретни резултати. Средбата се одржа во Брисел, а на неа присуствуваа главните преговарачи на двете страни – Петар Петковиќ (Србија) и Бесник Бислими (Косово, како и специјалниот претставник за ЕУ за дијалогот меѓу Белград и Приштина, Мирослав Лајчак.
„Ги угостив главните преговарачи на Белград и Приштина, Петар Петковиќ и Бесник Бислими на уште една рунда од дијалогот во Брисел. Разговаравме за понатамошна имплементација на договорот од 27 февруари, а имавме за цел да ги разјасните отворените прашања. Разговорите ќе продолжат“,
напиша Лајчак на Твитер.
I hosted the Chief negotiators of Kosovo @BislimiBesnik and Serbia @PetkovicPetar for another round of Dialogue meetings in Brussels. We discussed the way forward on the implementation of the 27 February Agreement and aimed to clarify open questions. Discussions will continue. pic.twitter.com/QjtHgeeBDF
— Miroslav Lajčák (@MiroslavLajcak) May 15, 2023
Српскиот преговарач, директор на Канцеларијата за Косово во Владата на Србија, Петар Петковиќ, изјави дека на средбата немало напредок, вклучувајќи го и прашањето за формирање Заедница на српски општини (ЗСО) во Косово.
Тој го обвини косовскиот преговарач дека одбил да разговара за клучните прашања оценувајќи го неговото однесување како скандалозно. Петковиќ посочи и оти кога дал предлог за решение за регистарските таблици, претставникот на Приштина не сакал да разговара за тоа.
Бислими, пак, по средбата изјави дека само разговарале за насоката во која се движи дијалогот и за сето она што се однесува на примена на договорот.
Ова беше прва средба на главните преговарачи по состанокот на високо ниво помеѓу српскиот претседател Александар Вучиќ и косовскиот премиер Албин Курти одржан на 2 мај во Брисел.
Извор: 360stepeni.mk
