Деновиве од печат излезе стихозбирката „За сите времиња“ од Братислав Ташковски. Издавач е ПНВ Публикации од каде што потенцираат дека се работи за врвно поетско дело на еден од бардовите на македонската поезија.
Книжевната критичарка Александра Јуруковска за книгата вели: Пред нас е новата поетска објава на Братислав Ташковски со сигнификантен наслов „За сите времиња“. Што е тоа што е за сите времиња во оваа книга? Песните во неа, сите песни, самата книга, желбата таа да остане ‘за вечни времиња’? Одговорот на сите овие прашања е ДА, но и многу повеќе.
Поетот и есеист Славе Ѓорѓо Димоски во освртот кон книгата ќе подвлече: Радува впечатокот што во оваа најнова поетска книга се потврдуваат високите поетски достојности на овој исклучителен поет и се истакнуваат во повеќеслојниот, алузивен наслов во кој се доближени до темелни симболи, раскошна секојдневна, комуникативна природа, проткаена со интелектуална, филозофска, историска и креативна длабочина.
Братислав Ташковски (1960) пишува поезија, романи, драми и есеи. Со посебни книги преведуван е на англиски, албански, бугарски и српски јазик, а со делови од творештвото на руски, шпански, француски, турски, шведски, романски, црногорски и русински јазик. Застапен е во многу антологиски избори на македонската поезија во земјава и странство. Бил претседател на Управниот одбор на поетската манифестација Струшки вечери на поезијата и покренувач и главен уредник на списанието за книжевност и култура АКТ. Живее и твори во Скопје.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
