„Документот не само што упатува на разузнавачки информации за Вагнер кој сакал да купи оружје од Турција, туку наведува и дека паравоената група планирала да продолжи со регрутирање на затвореници од руските затвори“, пишува Си-ен-ен
Руската паравоена група Вагнер која се бори во Украина во име на рускиот претседател Владимир Путин се обидела да купи оружје и опрема од Турција која е земја членка на НАТО, објави Си-ен-ен, повикувајќи се на еден од протечените тајни документи на Пентагон.
Медиумот пишува дека персоналот на Вагнер на почетокот на февруари се сретнал со „турските контакти“ со намера да купи оружје и опрема од Турција што потоа би можело да се користи во борбите против Украина.
Не е јасно кои биле тие „контакти“ или дали турската влада знаела за состаноците, но нема докази ниту дека е постигнат напредок во договорот во врска со продажба на оружје на руската паравоена група.
„Документот не само што упатува на разузнавачки информации за Вагнер кој сакал да купи оружје од Турција, туку наведува и дека паравоената група планирала да продолжи со регрутирање на затвореници од руските затвори“,
пишува Си-ен-ен.
Портпаролот на Стејт департментот рече дека Министерството за одбрана и разузнавачката заедница активно ја разгледуваат и проценуваат валидноста на објавените документи, додавајќи дека не се во позиција да потврдат или да коментираат какви било информации што ги содржат документите.
Турската влада го изрази своето противење на руската инвазија на Украина, но сепак, за разлика од многу сојузници на НАТО, таа одржува блиски врски со владата во Москва.
Извор: 360stepeni.mk
