Турските гласачи се поларизирани со години, но Ердоган е под притисок како никогаш досега. Државата станува се поавторитарна под водството на нејзиниот актуелен лидер кој ја води Турција од огромната палата со голем дел од медиумите контролирани од неговите сојузници, анализира Би-би-си
Претседателот на Турција, Реџеп Тајип Ердоган (69), и официјално ја започна изборната трка во која ќе се обиде да ја задржи власта која ја има 20 години.
Тој денеска го претстави манифестот на неговата Партија на правдата и развојот (АКП) во пресрет на претседателските и парламентарните избори на 14 мај и рече дека целиот муслимански свет го чека исходот.
Овие избори ќе бидат најтешкиот предизвик за актуелниот турски претседател ако се има предвид дека на спротивната страна се шест опозициски партии кои ги здружија силите за претстојните избори.
Изборите доаѓаат во период кога Турција се соочува со зголемена инфлација и се опоравува од разорните земјотреси во кои загинаа околу 50 000 луѓе.
Овие прашања се и во фокусот на кампањата, а Ердоган на Турците им ветува дека ќе ја спушти инфлацијата на едноцифрени бројки, нешто што веќе го ветија и неговите противници.
Турските гласачи се поларизирани со години, но Ердоган е под притисок како никогаш досега. Државата станува се поавторитарна под водството на нејзиниот актуелен лидер кој ја води Турција од огромната палата со голем дел од медиумите контролирани од неговите сојузници, анализира Би-би-си.
Ердоган ја има власта во Турција од 2003 година кога стана премиер, а потоа и претседател во 2014 година. Во 2016 година имаше обид за пуч, по што Ердоган драматично си ги зголеми претседателските овластувања. Претходно, беше и градоначалник на Истанбул со мандат од 1994 до 1998 година.
Еден од најголемите негови ривали е актуелниот градоначалник на Истанбул, Екрем Имамоглу. Тој го победи кандидатот од партијата на Ердоган на изборите во 2019 година, но лани беше осуден на две години затвор со што доби и забрана за политичко дејствување поради наводни навреди упатени кон членовите на Државната изборна комисија.
На изборите за шеф на државата сега на Ердоган ќе му се спротивстави Кемал Киличдароглу (74) кој е од редовите на опозициската Републиканска народна партија, а беше избран за заеднички кандидат на шесте опозициски партии.
Тој беше на чело на партијата во низа изборни порази, но овој пат токму поради единството во опозициските редови, се предвидува дека исходот може да биде и поинаков.
Покрај од обединетиот блок, се смета дека неофицијално на претседателските избори тој ја има поддршката и од прокурдската партија ХДП, која на парламентарните избори, пак, настапува под знамето на партијата Зелена левица со оглед дека самата не може да се кандидира поради судски спор против неа.
Извор: 360stepeni.mk
