Во неверојатен расплет на случувањата, Барселона би можела да остане без својот „бисер“ Гави, пишува шпански „АС“. Одличниот млад играч за врска на почетокот на годината потпиша нов договор со „Каталонците“ до 2026 година, но истиот би можел да биде раскинат поради големите финансиски проблеми на клубот.
Гави имаше јуниорски договор со Барселона, а потоа потпиша професионален, во кој има клаузула од 1 милијарда евра. Барселона имаше рок до крајот на јануари да го регистрира за продолжението на сезоната, но само ако неговата плата успее да „влезе“ во финансискиот фер плеј.
Барселона тоа едвај го направи во последниот ден од преодниот рок, но Ла Лига ја одби приложената документација и одби да го регистрира играчот. Барселона се жалеше и успеа да обезбеди одложување на одлуката.
Според најновите информации, клубот мора до 30. јуни да го намали буџетот за плати за дури 200 мииони евра. Ако Барса не го стори тоа, ќе ја поништи регистрацијата на Гави и тој ќе биде слободен играч.
„АС“ пиштува дека Барселона нема повеќе простор и речиси е невозможно нешто да се промени, додавајќи дека Гави веќе не е задоволен со овој статус и дека и самиот тој размислува за заминување.
ИЗВОР: kurir.mk
