Доналд Трамп денеска ќе стане првиот актуелен или поранешен претседател на САД кој ќе се појави пред суд за да се соочи со кривични обвинувања.
Поранешниот лидер и републикански фаворит за изборите во 2024 година беше обвинет минатата недела во Њујорк за тајни плаќања на порно ѕвездата Сторми Даниелс.
Иако обвинувањата се први во САД, Трамп не е единствениот светски лидер што се соочува со нив.
Следува листа на дел од поранешни лидери кои исто така се најдоа на обвинителна клупа.
Аргентина
Кристина Фернедез де Кирхнер: Во 2022 година, потпретседателката на Аргентина беше прогласена за виновна за измама во случај што датира од нејзиното претседателствување од 2007 до 2015 година.
Таа беше осудена на шест години затвор и доживотна забрана за вршење политичка функција.
Бразил
Луис Инасио Лула да Силва: Актуелниот претседател на Бразил, кој исто така ја водеше земјата од 2003 до 2010 година, во 2017 година беше осуден под обвинение за перење пари и корупција.
Пресудата беше поништена во 2021 година.
Хрватска
Иво Санадер: Во 2020 година, поранешниот хрватски премиер беше прогласен за виновен за корупција и беше осуден на осум години затвор.
Во моментов ја издржува казната.
Франција
Жак Ширак: Во 2011 година, поранешниот француски претседател, кој почина во 2019 година, беше осуден за корупција и осуден на двегодишна условна затворска казна.
Тој, исто така, беше прогласен за виновен за трговија со влијание, нарушување на довербата и проневера додека беше градоначалник на Париз.
Никола Саркози: Во 2021 година, Саркози стана вториот поранешен француски претседател кој беше осуден за корупција и трговија со влијание.
Тој беше осуден на три години затвор, од кои две години условно.
Германија
Кристијан Вулф: Во 2013 година, почна судење на поранешниот германски претседател кој беше обвинет за примање и давање услуги на должност.
Во 2014 година тој беше прогласен за невин.
Израел
Моше Кацав: Поранешниот израелски претседател беше осуден на седум години затвор во 2011 година за силување и други сексуални престапи врз подредени.
Тој беше во затвор малку повеќе од пет години.
Ехуд Олмерт: Поранешниот израелски премиер беше осуден за измама, злоупотреба на доверба и даночно затајување во 2015 година и беше осуден следната година.
Тој отслужи две третини од 27-месечната казна.
Бенјамин Нетанјаху: На актуелниот израелски премиер, кој го отслужува својот шести мандат, му се суди за измама, злоупотреба на службената положба и корупција.
Тој беше обвинет во 2019 година во долготрајни случаи во кои се терети за примање подароци од пријатели милионери и обезбедување регулаторни услуги на медиумски тајкуни во замена за поволно известување.
Италија
Силвио Берлускони: Поранешниот италијански премиер беше ослободен од обвиненијата за поткуп во три судења во 2021, 2022 и 2023 година.
Во 2015 година тој беше ослободен од обвиненијата за малолетничка проституција и злоупотреба на положбата.
Берлускони се соочи со повеќе од 30 кривични постапки од влегувањето во политиката во 1994 година.
Малезија
Мухијдин Јасин: Поранешниот премиер на Малезија минатиот месец беше обвинет за злоупотреба на моќ и перење пари во врска со доделување владини договори за време на пандемијата на Ковид-19.
Наџиб Разак: Друг поранешен малезиски премиер во моментов отслужува 12-годишна затворска казна, почнувајќи од 2022 година, откако изгуби жалба во случај за корупција.
Во 2020 година, тој беше прогласен за виновен за кривично дело нарушување на довербата, злоупотреба на моќта и перење пари во врска со грабежот на државниот фонд за развој 1MDB.
Јужна Африка
Џејкоб Зума: Поранешниот јужноафрикански претседател е вмешан во судење за корупција, каде што се соочува со обвиненија поврзани за перење пари и рекетирање во времето кога бил заменик-претседател во 1999 година.
Јужна Кореја
Ли Мјунг-бак: Во 2020 година, поранешниот претседател на Јужна Кореја беше осуден на 17 години затвор за поткуп и проневера, но беше помилуван во 2022 година.
Парк Геун-Хје: Поранешната претседателка, првата жена на таа позиција, беше прогласена за виновна во 2018 година за обвиненија поврзани со поткуп и принуда.
Таа беше осудена на 15 години затвор, но беше помилувана во 2021 година.
Пакистан
Имран Кан: Најмалку 85 случаи се покренати против поранешниот премиер на Пакистан.
Кан се соочува со обвиненија за корупција, „тероризам“, непочитување на судот, бунт и богохулење.
Португалија
Хозе Сократес: Поранешниот премиер во 2017 година беше обвинет за корупција, вклучувајќи мито, перење пари и даночна измама.
Во 2021 година, судијата ги отфрли обвиненијата за корупција, но ги потврди помалите обвиненија.
ИЗВОР: kurir.mk
