Vetëm pesë ditë kanë mbetur deri në përfundimin e afatit kushtetues për zgjedhjen e presidentit të Kosovës, ndërsa partitë politike ende nuk kanë arritur një marrëveshje për zgjidhjen e këtij procesi.
6 tetori pritet të jetë një datë kyçe për institucionet e vendit, pasi përfundimi i afatit do të hapë një situatë të re politike dhe institucionale. Në këto rrethana, partitë po përpiqen të gjejnë një zgjidhje përmes dialogut politik, në mënyrë që procesi i zgjedhjes së presidentit të përfundojë brenda afatit.
Kryeministri në detyrë i Kosovës, Albin Kurti, pas mbledhjes së Qeverisë ka folur për mundësinë e një marrëveshjeje të re ndërmjet partive politike. Ai tha se nevojiten takime dhe bisedime të reja, duke theksuar se Kosova nuk ka nevojë për destabilizim të mëtejshëm institucional.
Kurti ka përmendur edhe marrëveshjen e mëparshme politike, e cila ishte mbështetur me 99 vota, duke vlerësuar se një dakordim i tillë mund të përsëritet.
“Duhet të ketë takime, bisedime e pajtime. Unë e kam parë që është e mundshme, ekziston rruga në të cilën mund të ecim bashkë”, deklaroi Kurti.
Sa i përket kandidaturës për president, Kurti bëri të ditur se Lëvizja Vetëvendosje vazhdon t’i qëndrojë marrëveshjes politike dhe kandidaturës së Bekim Sejdiut.
Sipas tij, Sejdiu ishte tërhequr nga gara pasi gjashtë deputetë të LDK-së nuk e kishin respektuar marrëveshjen e arritur ndërmjet subjekteve politike.
“Nga pikëpamja e LVV-së, ne kemi marrëveshje politike dhe besoj që duhet ta respektojmë atë. Nuk kemi emër të ri ose tjetër”, u shpreh Kurti.
Ai la të hapur mundësinë që, nëse në të ardhmen do të propozohej një kandidat tjetër për president, për këtë do të njoftohej publiku.
Në këtë situatë, profesor i shkencave politike, Nexhmedin Spahiu, vlerëson se partitë politike aktualisht nuk shohin interes për shkuarjen në zgjedhje të reja.
Sipas tij, pikërisht për këtë arsye, ditët në vijim do të jenë të rëndësishme për të parë nëse subjektet politike do të arrijnë të gjejnë një kompromis për zgjedhjen e presidentit.
“Tani të gjitha partitë politike në Kosovë nuk shohin interes nga zgjedhjet e reja. A do të mund t’i shmangim ato është pyetja e madhe. Secila palë do të përpiqet ta tërheqë litarin nga vetja dhe litari mund të këputet. Pra, ekziston mundësia që, nëse palët nuk arrijnë një kompromis, kjo përplasje politike të çojë në një situatë të re institucionale”, është shprehur Spahiu.
Duke komentuar qëndrimin e Kurtit për një marrëveshje të mundshme, Spahiu tha se kryeministri në detyrë është i hapur edhe për mundësinë e një kandidati konsensual jashtëpartiak.
“Albin Kurti është i hapur për ndonjë emër konsensual jashtëpartiak, por që nuk ka ndonjë vizion vetanak, në mënyrë që ai të jetë njëkohësisht edhe kryeministër, edhe de facto president”, deklaroi Spahiu.
Sipas tij, çështja e presidentit tashmë është kthyer në një pikë të rëndësishme të negociatave ndërmjet partive politike, ndërsa hapësira kohore për të arritur një marrëveshje po ngushtohet.
Afati 60-ditor për zgjedhjen e presidentit të Kosovës ka nisur më 8 gusht 2026, pas zhvillimeve të lidhura me konstituimin e Kuvendit. Sipas këtij afati, procesi duhet të përfundojë deri më 6 tetor 2026.
Nëse partitë politike nuk arrijnë një marrëveshje për zgjedhjen e presidentit brenda afatit kushtetues, vendi mund të përballet me një tjetër zhvillim politik dhe institucional, duke e bërë ditët e ardhshme vendimtare për arritjen e një kompromisi.
Burimi: botasot
