Фудбалската репрезентација на Македонија вечерва против Словенија во Љубљана го игра вториот натпревар од Лигата на нации. Јавноста се надева на многу подобро издание од првиот меч против Швајцарија, а тоа секако ќе биде надмудрување ни на двата селектора, Боштјан Цесар и Гоце Седлоски.
Интересно е дека тие одлично се познаваат и своевремено беа и соиграчи во Динамо Загреб.
„Со Седлоски сме играле заедно. Се видовме пред летото, кога разговаравме и за ждрепката. Добро го познавам, а во меѓувреме добро ја анализиравме и македонската репрезентација. Со нетрпение го очекувам утрешниот натпревар, но и повторната средба со селекторот на Македонија“, истакна Боштјан Цесар.
Малкумина знаат дека Боштјан Цесар беше и прв избор на раководството на Вардар за наследник на Гоце Седлоски на клупата на Вардар. По освоената титула, Седлоски замина и го презеде кормилото на Македонија, а Вардар уште претходно беше во контакт со Цесар за да го наследи на клупата на најтрофејниот македонски клуб. Сепак, и тој доби можност да биде селектор на Словенија, па сега двајцата познаници ќе имаат дуел со своите селекции на „Стожице“ во Љубљана.
Извор: sportmanija.mk
