1 август 2026, Скопје – Јавните финансии се реализирале во согласност со планираните фискални цели, со редовно и навремено сервисирање на сите законски обврски кон граѓаните и стопанството, како и со реализација на значајни капитални инвестиции што придонесуваат за економски раст и подобрување на инфраструктурата, покажува Завршната сметка на Буџетот на РС Македонија за 2025 година, која беше изгласана во Собранието.
Образложувајќи ја Завршната сметка пред пратениците, заменик-министерот за финансии Николче Јанкулоски истакна дека во текот на 2025 година фискалната политика се спроведувала одговорно и дисциплинирано, при што биле обезбедени средства за непречено функционирање на институциите, редовна исплата на платите, пензиите, социјалните права и здравствените услуги, како и за реализација на развојните проекти.
Во 2025 година беше остварен реален раст на бруто-домашниот производ од 3,5%, при што двигатели на економската активност беа градежништвото и услужниот сектор. Градежништвото забележа двоцифрен раст од 13,7%, пред сè како резултат на засилените инфраструктурни инвестиции.
Вкупните приходи на Буџетот беа реализирани во износ од 335,7 милијарди денари, што претставува раст од 9,9% во однос на претходната година, додека даночните приходи и социјалните придонеси достигнаа реализација од 96,2% од планираното. Вкупните расходи изнесуваа 377,5 милијарди денари, при што сите законски обврски на државата беа исполнувани навремено и без застој.
Во текот на годината редовно се исплаќаа пензиите, социјалните надоместоци, средствата за здравствена заштита, дотациите за општините, субвенциите за земјоделците, како и останатите обврски на државата.
Капиталните расходи достигнаа 28,5 милијарди денари и беа насочени кон реализација на инфраструктурни проекти, пред сè во патната инфраструктура, со значајни инвестиции во изградбата на делниците од Коридорот 8 и Коридорот 10д.
Буџетскиот дефицит во 2025 година изнесуваше 41,8 милијарди денари или 4% од БДП, што е во рамките на планираното и е резултат на политиките за внимателно и одговорно управување со јавните финансии и јавниот долг.
„Јавните финансии во текот на 2025 година, во услови на бројни предизвици, обезбедија навремена исплата на законски остварените права и реализација на стратешки приоритети без да се загрози фискалната одржливост на земјата, со едновремено реализирање на ефикасна јавна потрошувачка“, истакна заменик-министерот за финансии Николче Јанкулоски.
Тој нагласи дека Завршната сметка претставува потврда за реално планирање и одговорно извршување на Буџетот, при што и во услови на глобални економски предизвици биле зачувани макроекономската стабилност и фискалната одржливост, а истовремено продолжиле инвестициите во инфраструктурата и развојните проекти кои имаат долгорочен позитивен ефект врз економијата и квалитетот на животот на граѓаните.
