Барселона
почна да им дели нараквици за следење на телесната температура на работниците
кои работат на отворено, со цел да се намали ризикот од топлотен удар за време
на сè почестите и поинтензивни топлотни бранови, извести агенцијата „Ројтерс“.
Градот
набави околу 1.400 нараквици за комуналните работници, меѓу кои се чистачите на
улици, вработените во јавното осветлување, работниците во парковите и
вработените задолжени за собирање отпад.
Нараквиците
ја следат телесната температура на корисникот и со звучен и вибрациски сигнал
предупредуваат кога ќе проценат дека постои зголемен ризик за здравјето. Во тој
случај, работникот мора веднаш да прекине со работата. Координаторот за
превенција во градската служба за паркови и градини, Пеп Лимона, изјави дека
станува збор за начин на прилагодување кон сè поагресивните последици од
климатските промени.
Во Шпанија
во последните години се забележани неколку смртни случаи на работници на
отворено за време на периоди на екстремни горештини, поради што во бројни
средини се изменети условите и организацијата на работата.
Во Барселона
во јуни минатата година, за време на чистење на улиците, почина 51-годишна
жена, кога температурата на воздухот достигна 30,4 Целзиусови степени. Градот
тогаш покрена истрага, а портпаролот изјави дека немало индиции оти причина за
смртта бил топлотен удар. Лимона нагласи дека проектот за воведување на
нараквиците бил подготвен уште пред тој случај, но дека настанот ја забрзал
неговата примена.
„Тоа нè
поттикна уште посериозно да размислиме за заштитата на работниците“, рече тој.
Шпанија во последните недели, како и голем дел од Европа, се соочува со многу
високи температури. Државната метеоролошка служба „Аемет“објави дека
овогодишниот јуни бил вториот најтопол откако се вршат мерењата, а за викендот
се очекува нов топлотен бран.
„Откако од
година во година станува сè потопло, на работа мораме да бидеме уште
повнимателни“, изјави раководителката на комуналната служба, Естер Хименез,
додавајќи дека стравува оти некој од работниците би можел да доживее топлотен
удар.
Извор: vecer.mk
