Градоначалникот на Прилеп, Дејан Проданоски, вечерва ќе им оддаде признание на најуспешните ученици од градот на свечен настан посветен на нивните достигнувања во образованието. Во пресрет на настанот, Проданоски порача дека младите и нивните успеси се најсилната потврда за квалитетот, трудот и посветеноста во образованието.
„Нашите ученици се нашата најголема гордост и најсилна потврда дека знаењето, трудот и посветеноста секогаш носат резултати“, истакнува Проданоски.
Во паркот на Могилата, со почеток во 19:00 часот, ќе се одржи свечен настан на кој ќе бидат доделени признанија на наградените ученици од државни и меѓународни натпревари, како и на првенците на генерациите, кои со своите резултати достојно го претставуваат Прилеп.
Настанот ќе биде збогатен со музичко-забавна програма, а неговата цел е да им се оддаде признание за трудот, знаењето и посветеноста на младите.
Проданоски порача дека тие се вистински амбасадори на знаењето и инспирација за новите генерации, нагласувајќи дека иднината на Прилеп е во сигурни раце.
„Да продолжиме заедно да ги поддржуваме младите и нивниот пат кон успехот, затоа што нивниот успех е наша заедничка гордост и гордост на целиот Прилеп“, порачува градоначалникот.
