Секој ден нова манипулација на власта во економијата. Премиерот Мицкоски прво ја прогласи Македонија за „третата најбрзорастечка економија во Европа“, а вчера ја спушти амбицијата на „првите пет земји во Европа според растот на БДП“, истакна на прес-конференција Фатмир Битиќи, пратеник од СДСМ.
И во едниот и во другиот случај, како што рече, станува збор за иста политичка намера, од една статистичка бројка да се направи економска бајка, додека граѓаните живеат во кошмарна економска реалност.
Економијата, според Битиќи, не се мери со самопофалби, туку со тоа што граѓаните реално можат да купат со својата плата – колку килограми овошје, колку месо, колку литри млеко, колку бензин, колку денови им се исполнети со достоинствен живот.
„Државниот завод за статистика објави раст на БДП од 3,1% во првиот квартал. Но истиот извештај покажува дека финалната потрошувачка има учество од дури 86,4% во БДП. Ова е клучен параметар на економијата кој премиерот вчера го премолчи.
Растот главно доаѓа од потрошувачката, а потрошувачката расте во услови на високи цени, односно инфлација.
Кога граѓаните плаќаат повеќе за истите производи, номиналната потрошувачка расте. Но тоа не значи подобар живот, тоа значи поскап живот“.
Битиќи појасни дека ко БДП расте 3,1%, а инфлацијата е 5,7%, тогаш цените растат побрзо од економијата.
„Во реалноста, граѓаните трошат повеќе пари, а дома носат помалку производи.
Владата може да слави проценти, но граѓаните секој ден бројат денари.
Премиерот зборува за раст, но не зборува дека храната и безалкохолните пијалаци се поскапени за околу 8% на годишно ниво. Не зборува дека инфлацијата во Македонија е 5,7%, додека во Европската Унија е 3,2%, а во еврозоната 3%. Што значи дека нашите граѓани се под посилен ценовен притисок од европските граѓани“.
Осврнувајќи се на индустриското производство кажа дека тоа во јануари било намалено за 6,6%, во февруари за 4,2%, а за првите четири месеци од годината растот е само 0,2%. Ова, како што оцени, повеќе личи на стагнација отколку на индустриски подем.
„Уште посериозно, бројот на работниците во индустријата во април е намален за 2,3%, а во првите четири месеци за 3%. Не може да се прогласува индустриски успех додека индустријата губи работници.
Градежништвото расте за 7,2%, но и тука приказната има друга страна. Цените на становите во Скопје во првиот квартал се повисоки за 16,7% на годишно ниво. Ако градежништвото расте, а домот станува сè понедостапен, тогаш растот на БДП не носи сигурност и достоинство“.
Вистински економски напредок, посочи Битиќи, има само тогаш кога граѓанинот со својата плата може да купи повеќе, да живее посигурно и да планира иднина без страв од висината на следната сметка.
Извор: zurnal.mk
