ВЛЕН упати остри критики кон поранешниот министер за правда Блерим Беџети, обвинувајќи го дека за време на неговиот мандат не направил ништо за полагањето на правосудниот испит да биде овозможено и на албански јазик.
Од ВЛЕН посочуваат дека Беџети бил на чело на Министерството за правда 1058 дена и, како што велат, имал целосни надлежности и можности да го реши ова прашање, но не презел никакви чекори.
„Денес се обидува да се претстави како заштитник на кауза што самиот ја запостави додека беше министер“, наведуваат од коалицијата.
Во реакцијата, ВЛЕН ја спомнува и претходно објавената аудиоснимка поврзана со Блерим Беџети и Муса Џафери, во која се слуша изјавата: „Ајде, еден Албанец помалку во обвинителството нема да не однесе во џенет“.
Според ВЛЕН, оваа изјава, како и нерешавањето на прашањето за правосудниот испит на албански јазик, покажуваат како, според нив, биле третирани интересите на Албанците во минатото.
Од коалицијата тврдат дека одредени позиции што им припаѓале на Албанците завршувале во политички договори со тогашната власт и со мрежите на Никола Груевски и Сашо Мијалков.
„Албанците немаат потреба од патриоти со изборен рок, туку од претставници кои нема да ги продаваат нивните интереси за функции и политички договори“, велат од ВЛЕН.
Во соопштението додаваат дека остануваат посветени на решавање на проблемите што, според нив, со години биле оставени нерешени, нагласувајќи дека студентите, правниците и граѓаните заслужуваат конкретни решенија, а не, како што наведуваат, „лажен патриотизам и политички маркетинг“.
