Во ООУ „Страшо Пинџур“ во Мало Коњари денеска се одржа настан исполнет со детска смеа, музика, игра и позитивна енергија, на кој присуствуваше градоначалникот на Општина Прилеп, Дејан Проданоски.
Под мотото „Со песна ја будиме пролетта“, учениците од училиштето со своите настапи ја покажаа својата креативност, талент и радост, претворајќи го настанот во вистински празник на детството.
Проданоски упати честитки до учениците кои настапија, како и до наставниците, организаторите и родителите кои, како што истакна, со посветеност придонеле овој ден да биде посебен и достоинствено одбележан.
Тој нагласи дека ваквите настани се потсетник дека се ближи крајот на уште една успешна учебна година, исполнета со труд, знаење и убави спомени, додавајќи дека општината ќе продолжи да ги поддржува младите и да создава услови за нивен развој.
