Ве молам, потпретседателе, стопирајте ми го времето. Ве молам да го почекаме да влезе во собраниската сала заменикот-претседател на Владата за добро владеење, Арбен Фетаи. Уредно најавив прашање и ми беше одговорено дека тој ќе дојде за да ми одговори, рече на денешната седница за пратенички прашања пратеничката од СДСМ, Даниела Николова, обраќајки му се на потпретседателот на Собранието, Антонијо Милошоски.
Притоа, Милошоски одговори дека вицепремиерот за добро владеење Фетаи бил уредно известен и поканет да присуствува за да одговори на нејзиното прашање, но дека тој сепак не дошол.
Николова сепак го искористи правото да го постави прашањето до Фетаи.
-Сакам да прашам колку точно време Арбен Фетаи не оди на работа? Дали тој за тоа време зема плата и кој му ги плаќа патувањата, меѓу кои има и дестинации во егзотични земји, од кои тој самиот споделува слики на социјалните мрежи? Кои се придобивките за Владата и за граѓаните од тие негови патувања и од неодењето на работа? Кои се придобивките од неговото патување во Тајланд, од кое самиот објави слики? – рече Николова.
Во однос на тоа, Милошоски рече: „Пратеничке Николова, со оглед на тоа што вицепремиерот не е присутен, службите писмено ќе ви одговорат на вашите прашања“.
Неодамна, премиерот Христијан Мицкоски изјави дека вицепремиерот Фетаи најавил повлекување од Владата.
Извор: zurnal.mk
