Иранската морнарица го заплени танкерот „Оушн Кои“ под обвинение за обид за нарушување на иранскиот извоз на нафта и националните интереси, објави новинската агенција „Тасним“. Запленувањето го извршиле специјални единици на иранските поморски командоси во текот на „специјална операција“, чија точна локација и сопственоста на бродот засега остануваат непотврдени. Овој потег доаѓа во критичен момент по директната размена на оган меѓу иранските и американските воени сили, со што сериозно е загрозено едномесечното примирје воспоставено по конфликтот од крајот на февруари.
Тензиите дополнително се заострија со меѓусебните обвинувања за кршење на прекинот на огнот. Додека американскиот претседател Доналд Трамп информираше дека три американски разорувачи биле нападнати при премин низ стратешкиот Ормутски теснец, иранската војска тврди дека Вашингтон прв извршил напад врз нивни бродови. Во екот на овие судири, портпаролот на иранското Министерство за надворешни работи, Есмаил Багеи, испрати симболична, но остра порака на арапски јазик, предупредувајќи дека покажувањето на забите на „лавот“ не треба да се толкува како насмевка, алудирајќи на подготвеноста на Иран за натамошен воен одговор.
Извор: vecer.mk
