Учениците
кои ги малтретираат другите, вклучително и преку дигитално насилство, ќе се
соочат со тепање со стап како „крајна мерка“ според новите насоки воведени во
Сингапур.
Учениците
(момчиња) можат да добијат до три удари со стап според новите правила за кои се
расправаше во парламентот во вторникот, пренесуваат медиумите.
Меѓународните
организации како УНИЦЕФ, агенцијата на ОН за деца, се противат на користењето
телесно казнување врз децата, наведувајќи дека тоа му штети на нивното физичко
и ментално здравје и со текот на времето ги зголемува проблемите во
однесувањето.
Министерот
за образование Десмонд Ли им рече на законодавците дека тепањето со стап ќе се
применува само „доколку сите други мерки се недоволни, со оглед на тежината на
прекршокот“.
„Се следат
строги протоколи за да се осигура безбедноста на учениците. На пример, тепањето
со стап мора да го одобри директорот и може да го спроведува само овластен
наставен кадар“, рече тој, пренесува „Гардијан“.
„Училиштата
ќе ги земат предвид факторите како што е зрелоста на ученикот и дали тепањето
со стап ќе му помогне на ученикот да научи од својата грешка и да ја разбере
тежината на она што го направил“.
Мерките
следуваат по едногодишна анализа која беше фокусирана на врсничкото насилство,
а доаѓаат по неколку медиумски експонирани инциденти на насилство во училиштата
кои минатата година го привлекоа вниманието на јавноста.
Тепањето со
стап ќе се користи како казна само за машките ученици во повисоките одделенија
од основното училиште (возраст од 9 до 12 години) и постарите, рече Ли,
укажувајќи на кривичниот закон на земјата, кој забранува тепање со стап врз
жени.
Откако ќе се
изврши казната со стап, училиштето ќе ја „следи благосостојбата и напредокот на
ученикот“, вклучувајќи и обезбедување советување, рече Ли. Ученичките, како што
наведе тој, ќе добиваат казни „како останување по наставата и/или суспензија,
прилагодување на оценката по поведение и други училишни мерки“.
Судското
тепање со стап, за првпат воведено од британските колонијалисти во 19 век, сè
уште се користи во Сингапур за машки престапници помлади од 50 години. Тоа
вклучува кривични дела како грабеж, измама или пречекорување на престојот во
земјата за повеќе од 90 дена.
Извештајот
објавен минатата година од Светската здравствена организација наведе дека
телесното казнување и понатаму е „загрижувачки распространето“ ширум светот,
додавајќи дека предизвикува значителна штета на здравјето и развојот на децата.
Глобално, се
проценува дека 1,2 милијарди деца на возраст од 0 до 18 години секоја година се
изложени на телесно казнување во домот, според податоците на СЗО.
Извор: vecer.mk
