Турскиот претседател Реџеп Тајип Ердоган изјави пред генералниот секретар на НАТО Марк Руте дека Анкара вложува напори за обновување на преговорите меѓу Русија и Украина и оти очекува Алијансата да преземе поголема одговорност за трансатлантската безбедност, пренесе агенцијата Анадолија.
За време на денешната средба во претседателската палата „Бештепе“ во Анкара, која се одржа зад затворени врати, двајцата соговорници направија сеопфатен преглед на подготовките за претстојниот Самит на НАТО во Анкара на почетокот на јули.
Ердоган нагласи дека одржувањето на трансатлантската врска е од исклучително значење и дека Турција очекува европскиот столб на Алијансата да преземе поголема одговорност. Тој подвлече дека исклучувањето на европските сојузници кои не се членки на ЕУ од одбранбените иницијативи на Унијата нема да придонесе кон таа цел.
На средбата присуствуваа и турскиот министер за надворешни работи Хакан Фидан, министерот за одбрана Јашар Ѓулер и главниот советник Акиф Чагатај Килич. Руте претходно, при посетата на компанијата „Аселсан“, увери дека Алијансата секогаш ќе го прави неопходното за да ја заштити Турција.
– Иран сее терор и хаос, а тоа силно се чувствува тука во Турција. Изминатите недели НАТО успешно пресретна четири ирански балистички ракети насочени кон Турција – потсети Руте, додавајќи дека Алијансата е подготвена за вакви ситуации, особено во контекст на тензиите во поширокиот регион кај Ормуската Теснина и Блискиот Исток.
На самитот во јули се очекува учество на околу 6.000 претставници во време на зголемени глобални конфликти.
Извор: vecer.mk
