Од јуни се очекува да биде воспоставена нова меѓуградска железничка линија Прилеп – Битола – индустриската зона „Жабени“, со цел олеснување на движењето на граѓаните додека траат градежните работи на автопатот Прилеп – Битола.
Иницијативата предвидува воведување на градски воз кој ќе сообраќа меѓу двата града и индустриската зона, а повратната карта би чинела 150 денари. Новата линија треба да овозможи побрз и поефикасен транспорт, особено за вработените во зоната „Жабени“ и за граѓаните кои секојдневно патуваат меѓу Прилеп и Битола.
Според најавите, сегашниот патен правец се користи со намален капацитет поради изградбата на автопатот, чиј завршеток се очекува во пролетта 2029 година, што дополнително ја зголемува потребата од алтернативен превоз.
Министерот за транспорт и врски, Александар Николоски, истакна дека се работи на финализирање на планот и дека веќе се водат разговори со директорите на железничките претпријатија. Тој изрази очекување дека проектот ќе стане реалност најдоцна до јуни.
Новата линија се гледа како привремено, но значајно решение за подобрување на поврзаноста и олеснување на секојдневниот транспорт во регионот.
