Изградбата на автопатот Прилеп – Битола се одвива со засилено темпо, при што досега се пробиени 22 километри од вкупно планираните 40 километри, односно реализирани се околу 55 проценти од трасата.
Вицепремиерот и министер за транспорт и врски, Александар Николоски, информира дека проектот се спроведува согласно предвидената динамика. Паралелно со земјените работи, на терен се изведуваат и значајни инфраструктурни објекти, меѓу кои два моста, два потпатника, еден натпатник и една клучка.
Според Николоски, изградбата на овој автопат претставува клучен проект за развојот на Пелагонискиот регион. Тој посочи дека навременото завршување ќе овозможи подобра поврзаност, привлекување нови инвестиции, развој на локалната економија и отворање нови работни места.
Автопатот Прилеп – Битола е дел од стратешките инфраструктурни проекти кои имаат за цел унапредување на транспортната мрежа и економски раст на државата.
