Бројот на новородени бебиња во Европа драматично опаѓа, а демографските трендови покажуваат дека денес се раѓаат речиси двојно помалку деца отколку пред шест децении. Според најновите податоци, во ЕУ во 2024 година се родени околу 3,55 милиони бебиња, а стапката на фертилитет паднала на 1,34 деца по жена, што е најниско ниво во последните децении.
Во овој европски демографски пад, Македонија е малку над европскиот просек. Според податоците, стапката на фертилитет во земјава изнесува околу 1,44 деца по жена, но и понатаму значително е под нивото потребно за природно обновување на населението. За стабилна популација потребни се најмалку 2,1 деца по жена.
Проблемот дополнително се продлабочува ако се знае дека бројот на починати е поголем од бројот на родени. Во Македонија оваа појава е присутна веќе подолг период и станува сериозен демографски предизвик.
Дали е доволно свесно македонското население од овие ризици? Се преземаат ли доволно мерки од страна на државата за да се подобри демографската слика во Македонија?
Демографските политики – поддршка за младите семејства, подобри услови за работа и живот, како и мерки за задржување на младите во земјата – се повеќе се наметнуваат како клучни прашања за иднината на државата.
Сите во Македонија треба да мислиме и делуваме во правец на подобрување на демографската слика. Зарем и за ова сметаме дека ќе ни го реши ЕУ, а ние треба само Устав да смениме и да станеме дел од Унијата? Еве, гледаме дека и во Брисел го имаат демографскиот проблем и тешко го решаваат.
Извор: zurnal.mk
