Пред петнаесет години, на 1 март 2011 година, првиот број на македонскиот весник “Илинден“ беше објавен како двоен број (март/април). Македонскиот весник “Илинден“ е весник на Македонско друштво “Илинден“-Тирана.
Македонскиот весник “Илинден“ има објавено вкупно 71 број, докажувајќи континуитет и посветеност во информирањето на своите читатели и предизвикувајќи голем интерес кај читателите во Албанија, во татковината Македонија, како и во Македонската дијаспора во светот.
Според бројните писма што стигнуваат до редакцијата, како и комуникацијата преку профилите на весникот на социјалните мрежи со читателите, забележуваме дека во петнаесетгодишниот период весникот прераснал во сериозен весник, чии вести и теми сè повеќе стигнуваат до читателите.
Македонскиот весник “Илинден“ од март 2017 година, покрај печатената верзија, весникот може да се следи и преку веб-страницата www.vesnik-ilinden.com, на овој начин нашиот весник стана достапен за пошироката јавност.
Од септември 2017 година, македонскиот весник “Илинден“ е стандардизиран според меѓународните норми за печатени и електронски списанија со број ISSN 2522-6282 (онлајн) и ISSN 2522-4514 (печатено).
Oд август 2022 година, македонскиот весник “Илинден“ е член на платформата на Алијансата за етички медиуми (AEM), каде што членуваат 30 печатени и аудиовизуелни медиуми во Албанија.
Македонскиот весник “Илинден“ е дел од најголемите информативни платформи во Македонија time.mk, grid.mk и vesti.mk
За сите заинтересирани, сите изданија на македонскиот весник “Илинден“ се достапни и во Националната библиотека во Тирана, Библиотеката на Собранието на Албанија, Националната и универзитетска библиотека „Св. Климент Охридски“ во Скопјe, Библиотеката на Институтот за старословенска култура – Прилеп, Библиотеката на Академијата на науките и уметностите на Македонија, Библиотеката „Григор Перличев“ – Охрид и Државниот архив на Македонија.
Мисијата на нашиот весник останува да го поттикнува и промовира македонскиот јазик и македонскиот идентитет во Албанија. Остануваме уверени дека нашите активности ќе бидат соодветно поддржани од државните институции на Албанија и Македонија, како и од Македонците од целиот свет.
Редакцијата на македонскиот весник “Илинден“ изразува благодарност до сите свои соработници.
Македонскиот весник “Илинден“ дава голем придонес во промоцијата на македонскиот јазик и во покренувањето прашања од интерес за Македонците во Албанија, и постојано работи на заштита и афирмација на етничкиот, јазичниот, културниот идентитет и националните традиции на Македонците во Албанија.
Воедно, редакцијата изразува благодарност до лојалните читатели за покажаниот интерес за содржините што ги нуди весникот.
Да нѝ се множат јубилеите и понатаму.
Со почит,
Никола Ѓурѓај
Уредник на македонскиот весник “Илинден“
