Минатата година од октомври, банките во Македонија, Албанија, Црна Гора и Молдавија, започнаа со извршување трансакции преку СЕПА, што претставува конкретен чекор кон финансиска и економска конвергенција со Европската Унија.
Членството во Единствената област за плаќања во евра, СЕПА, веќе носи придобивки за граѓаните и компаниите, кои сега плаќаат многу помалку за трансакциите. За малите и за средните претпријатија, СЕПА носи значителни заштеди и овозможува поголема предвидливост на трошоците при прекуграничните трансакции.
„Фактор“ ги спореди надоместоците за кредитен трансфер во евра во странство преку електронско банкарство како најкористено средство за плаќање надвор од земјата, а закучокот е дека нема преголеми разлики помеѓу домашните комерцијални банки кои ја нудат оваа платежна услуга преку СЕПА. Евидентно е и тоа дека плаќањето е доста поевтино отколлку плаќањето преку коресподентско банкарство SWIFT За потсетување, привилегиите што ги нуди СЕПА важат само за трансфери кон земји-членки.
Се чини дека најевтина е услугата на УНИ банка со 60 денари провизија за плаќање до 2.500 евра, а се друго над тоа е 180 денари. И Стопанска банка наплаќа 60 денари, но со ограничување на трансферот до 500 евра, а се друго понатаму е од 180 до 600 денари. Кај НЛБ банка е 60 денари но само до 50 евра, понатаму се плаќа 310 денари, а ако е над 3.000 евра цената е 620 денари (ако е во рамки на НЛБ групацијата, износот е 310 денари). Комерцијална банка ќе ви наплати од 60 до 540 денари, но во ажурираната база на дневно ниво на Нароодна банка не е наведено кои се разграничувањата на сумите.
Плаќањето преку Халк банка и Централна кооперативна банка е фиксирано на 250, односно на 200 денари како платежна усллуга. Секое плаќање преку СЕПА кај Силк роуд и ПроКредит банка е 600 денари. Останатите неспомнати деловни банки сеуште не ја нудат оваа услуга.
СЕПА е иницијатива на Европската Унија што ги поедноставува плаќањата во евра, овозможувајќи им на поединците, бизнисите и владите поедноставно управување со платежните услуги преку побрзи, поефикасни, потранспарентни и побезбедни плаќања во евра.
Стандардизираните процеси и информативните формати на СЕПА обезбедуваат јасност и предвидливост во платните операции, побрзи трансакции, а при тоа плаќањата во евра се обработуваат истиот или најдоцна следниот работен ден низ земјите на СЕПА
Исплати во странство преку СЕПА системот се овозможени и шалтерски во самите банкарски филијали.
Извор: zurnal.mk
