Тројца мажи украле куфери со повеќе од 2 милиони евра во готово на прометна улица во центарот на Токио, соопштија денес полицијата и медиумите, во редок инцидент во јапонската престолнина, позната по својата безбедност, пренесува Прототема.
Напаѓачите употребиле солзавец за да ги украдат куферите со парите околу 21:30 часот во четврток во близина на станицата Уено, популарна туристичка област, изјави портпарол на полицијата во Токио за АФП.
Портпаролот одби да даде дополнителни детали, но локалните медиуми објавија дека жртвите на грабежот биле група од пет кинески и јапонски државјани, кои се обидувале да натоварат куфери со 2,3 милиони евра (420 милиони јени) во возило.
Според Фуџи ТВ, жртвите им рекле на полицајците дека парите биле наменети за менувачници.
Во одделен инцидент, маж кој носел околу еден милион евра (190 милиони јени) во готово бил нападнат со солзавец од тројца мажи на паркинг на аеродромот Ханеда во Токио синоќа, според јапонските медиуми. Полицијата истражува можна врска помеѓу двата напада, според телевизиската мрежа ТБС.
Извор: vecer.mk
