Претседателката на Европската комисија, Урсула фон дер Лајен, денеска преживеа гласање за недоверба од страна на крајнодесничарските пратеници во врска со трговскиот договор на Европската Унија со јужноамериканскиот блок Меркосур.
Предлогот, поднесен за време на пленарната седница во Стразбур, не успеа да обезбеди двотретинско мнозинство потребно за усвојување.
Предлогот за недоверба беше поднесен на 14 јануари од групата „Патриоти за Европа“, третата најголема политичка група во Европскиот парламент.
Групата ја обвини Европската комисија дека ги заобиколува и Европскиот парламент и националните парламенти при склучувањето на трговскиот договор со Меркосур и дека ги игнорира загриженостите на милиони европски земјоделци.
Предлогот на крајнодесничарите беше одбиен од 390 пратеници, со 165 „за“ и 10 воздржани.
Ова беше четврти пат Фон дер Лајен да се соочи со гласање за недоверба откако ја презеде функцијата по втор пат. Претходно, истиот преживеа слични предлози поврзани со ситуацијата во Појасот Газа и трговската политика на ЕУ во јули и октомври 2025 година.
Според договорот, тарифите за низа земјоделски производи, вклучувајќи говедско месо, живина, млечни производи, шеќер и етанол, ќе бидат намалени за земјите од Меркосур, имено Аргентина, Бразил, Парагвај и Уругвај, додека европските индустриски сектори ќе добијат поголем пристап до јужноамериканските пазари.
Договорот беше потпишан на 17 јануари во Парагвај, по повеќе од две децении преговори. Неговото усвојување беше одложено во декември поради широките протести на земјоделците и противењето од неколку земји-членки, вклучувајќи ги Франција, Ирска, Унгарија и Полска.
Во среда, Европскиот парламент усвои резолуција со која се бара од Европскиот суд на правдата (ЕСП) да издаде правно мислење за тоа дали договорот од Меркосур е компатибилен со договорите на ЕУ.
Извор: tv21
