По 27 години
брак, Мелинда Гејтс, според достапните податоци, добила вкупна исплата од дури
76 милијарди долари по разводот од Бил Гејтс.
Хуманитарната
фондација на Мелинда Гејтс тивко примила огромна донација од дури 7,9 милијарди
долари од нејзиниот поранешен сопруг, технолошкиот могул Бил Гејтс. Донацијата
е реализирана пет години по нивниот развод и е дел од финансиската спогодба
договорена во 2024 година, објави „Њујорк тајмс“.
Станува збор
за уплата што Фондацијата на Бил Гејтс ѝ ја извршила на приватната фондација на
Мелинда Гејтс – „Pivotal Philanthropies Foundation“, а износот веќе сега се
вбројува меѓу најголемите јавни хуманитарни донации во историјата.
Разводот на
Бил и Мелинда Гејтс официјално е прогласен за најскап развод на сите времиња.
По 27 години брак, Мелинда, според достапните податоци, добила вкупна исплата
од дури 76 милијарди долари. Пред разделбата, двојката беше меѓу најбогатите во
светот, со проценето заедничко богатство од околу 130 милијарди долари на
својот врв.
Мелинда
Гејтс, која со Бил има три деца, во изјава од 2021 година наведе дека нивниот
брак бил неповратно нарушен, со што беше потврден крајот на една од најмоќните
деловно-филантропски врски на современото време.
Иако
разводите на славните и богатите отсекогаш биле познати по астрономските
износи, дури и во тој контекст спогодбата на Гејтсови предизвика неверување.
Технолошките основачи како Бил Гејтс и Џеф Безос предничат кога станува збор за
финансиските размери на брачните разделби.
Џеф Безос и
неговата поранешна сопруга Мекензи Скот се разведоа во 2019 година, а таа тогаш
доби 38 милијарди долари и 25 отсто од акциите на „Амазон“. Нивниот брак траеше
26 години, а Мекензи беше покрај Безос уште од деновите кога „Амазон“ беше
основан во гаража.
Меѓу
најпознатите случаи се издвојува и разводот на Алек и Џоселин Вајлденштајн,
вреден 2,5 милијарди долари. Џоселин подоцна стана позната по екстравагантниот
начин на живот, вклучувајќи опсесија со естетски зафати и егзотични животни.
Ниту Холивуд
не е имун на скапи разводи. Мел Гибсон во 2011 година на поранешната сопруга
Робин Мур ѝ исплати 425 милиони долари, додека режисерот Стивен Спилберг уште
во 1989 година плати 100 милиони долари на Ејми Ирвинг.
И спортските
ѕвезди се најдоа на листата. НБА-легендата Мајкл Џордан ѝ плати 168 милиони
долари на поранешната сопруга Хуанита, а Тајгер Вудс по разводот во 2010
година, предизвикан од скандали со неверство, ѝ исплати 100 милиони долари на
Елин Нордегрен.
Разводот на
Бил и Мелинда Гејтс така стана мерило според кое денес се споредуваат сите
други – не само поради износот, туку и поради фактот дека дел од спогодбата
беше реализиран преку една од најголемите филантропски донации забележани во
историјата.
Извор: vecer.mk
