Компанијата Епл денеска официјално го потврди партнерството со фирмата Гугл, чии модели на вештачка интелигенција Џемини (Gemini) ќе ја придвижуваат новата генерација на асистентот Сири.
Веста ја подигна пазарната вредност на Гугл на повеќе од четири билиони долари. Оваа соработка ќе се фокусира на радикално унапредување на асистентот на Епл, Сири, чија нова верзија се очекува подоцна оваа година, пренесува Си-Ен-Би-Си.
Епл истакна дека по внимателна евалуација било заклучено дека технологијата на Гугл ја обезбедува вистинската основа за она што фирмата од Купертино сака да го постигне.
– Возбудени сме поради иновативните искуства кои Џемини ќе ги овозможи за нашите корисници, се наведува во официјалното соопштение на Епл.
Гугл кон крајот на минатата година го претстави новиот модел Џемини 3 (Gemini 3), модел кој постави нови стандарди во брзината и прецизноста, што очигледно беше пресуден фактор за раководството на Епл.
Со овој договор, Епл прескокнува години самостоен развој и директно имплементира докажано решение, додека Гугл добива пристап до стотици милиони корисници на ајфон ширум светот, наведува американската медиумска куќа.
Извор: kurir.mk
