ИСТАНБУЛ (АА) – Рускиот министер за одбрана Сергеј Шојгу вчера му рекол на американскиот секретар за одбрана Лојд Остин дека летот на американски беспилотни летала по должината на брегот на Крим е провокативен и создава предуслови за ескалација на ситуацијата во регионот на Црно Море, јавува Анадолу.
„Главен фокус беше размената на мислења за причините и последиците од инцидентот на 14 март со соборувањето на американското беспилотно летало во Црно Море“, се вели во соопштението на руското Министерство за одбрана објавено по телефонскиот разговор меѓу Шојгу и Остин.
Шојгу изјави дека соборувањето на беспилотното летало е предизвикано од американските дејства за непочитување на зоната на ограничување на летови прогласена од Руската Федерација во врска со „специјалната воена операција“ на Москва во Украина.
„Руската Федерација не е заинтересирана за ваков развој на настаните, но ќе продолжи да одговара на сите провокации на пропорционален начин“, се вели во соопштението, во кое се додава дека двете земји мора да се однесуваат колку што е можно поодговорно, вклучително и да одржуваат воени канали за комуникација во сите кризни ситуации.
Европската команда на САД соопшти дека инцидентот се случил откако два руски авиона „СУ-27“ „извршиле небезбедно и непрофесионално пресретнување“ на „Рипер“, вклучително и истурање гориво врз беспилотното летало и летање пред него „на непромислен, еколошки неисправен и непрофесионален начин“.
Беспилотното летало вршело извидување кога еден од авионите „СУ-27“ удрил во пропелерот на „MQ-9 Reaper“, што ги натерало операторите на беспилотното летало да го урнат во меѓународни води.
Рускиот амбасадор во САД, Анатолиј Антонов, рече дека беспилотното летало се обидело да собере информации за да ѝ ги пренесе на Украина за напади врз Русија.
Рускиот министер за надворешни работи Сергеј Лавров тврди дека Америка се обидува да бара некаква провокација за да ги ескалира своите конфронтирачки пристапи.
Извор: www.aa.com.tr
